चेल्सीले प्रशिक्षक पोटरलाई बर्खास्त गर्यो
सहयात्रा टिभी
काठमाडौँ । चैत २०, खराब प्रदर्शन गरेको कारण देखाई चेल्सीले मुख्य प्रशिक्षक ग्राहम पोटरलाई बर्खास्त गरेको छ ।
इङ्लिस प्रिमियर लिग फुटबलमा चेल्सीले लगातार खराब प्रदर्शन गरेपछि प्रशिक्षक पोटरलाई बर्खास्त गरेको जनाएको छ ।
उनी प्रशिक्षक भएको ७ महिनामै बर्खास्तीमा परेका हुन् । उनको नेतृत्वमा भएको खेलमा चेल्सीले ३१ मा ११ खेलमा हार बेहोरेको छ ।
थोमस टुचेललाई बर्खास्त गरेपछि गएको सेप्टेम्बरमा चेल्सीले उनलाई मुख्य प्रशिक्षक नियुक्त गरेको थियो । उनी बर्खास्त भएपछि चेल्सीले अब नयाँ प्रशिक्षकको खोजी सुरु गरेको छ ।
चेल्सी इङ्लिस प्रिमियर लिग फुटबलको ११औँ स्थानमा छ । उसले ३८ अङ्क जोडेको छ । पछिल्लो खेलमा पनि चेल्सी पराजित भएको थियो । शनिवार राति भएको खेलमा चेल्सी एस्टन भिल्लासँग २–० गोल अन्तरले पराजित भएको हो ।