नेत्रहीन टी-२० क्रिकेट सिरिज गुमाए पनि बिनिता र मनकेशी उत्कृष्ट घोषित
सहयात्रा टिभी
काठमाडौं । मंसिर २९, भारतको मुम्बईमा भएको महिला नेत्रहीन टी-२० क्रिकेट सिरिज गुमाए पनि नेपालकी बिनिता पुन र मनकेशी चौधरी आफ्नो क्याटेगोरीमा उत्कृष्ट खेलाडी बनेका छन् ।
नेपालकी बिनिता बी थ्री तथा मनकेशी बी टु क्याटेगोरीमा उत्कृष्ट खेलाडी घोषित भएका हुन् । यस्तै बी वान क्याटेगोरीमा भारतकी सिमु दास उत्कृष्ट बनिन् ।
यसअघि नै सिरिज गुमाइसकेको नेपाल शुक्रबार भएको पाँचौ तथा अन्तिम खेलमा भारतसँग ७ विकेटले पराजित भयो । यो जितपछि भारतले पाँच खेलको सिरिज ४-१ ले आफ्नो पक्षमा पार्यो ।
पहिलो खेलमा ८ र दोस्रो खेलमा ४ रनले पराजित भएको नेपालले तेस्रो खेल १० विकेटले जित्दै सिरिजमा पुनरागमन गरेको थियो । तर बाँकी दुई खेलमा भारत ७ विकेट र ८ विकेटले विजयी भयो ।
नेपालले दिएको १५४ रनको लक्ष्य भारतले १७.५ ओभरमै २ विकेट गुमाएर पूरा गर्यो । भारतका लागि सिमु दासले अविजित रहँदै सर्वाधिक ५२ रन बनाइन् ।