‘जन्ते बाख्रो’को पहिलो गीत ‘घामै राजा’ सार्वजनिक

सहयात्रा टिभी

काठमाडौं । चैत २२, निर्देशक सिमोस सुनुवारको निर्देशनमा निर्माण भएको नेपाली सिनेमा **‘जन्ते बाख्रो’**को पहिलो गीत ‘घामै राजा’ सार्वजनिक भएको छ। बिहीबार राजधानीमा आयोजित एक विशेष कार्यक्रममा सार्वजनिक गरिएको उक्त गीतमा संगीतकार बाबुल गिरीको शब्द, संगीत तथा स्वर रहेको छ।

गीतको भिडियोमा सौगात मल्ल र गरिमा शर्माको रोमान्टिक केमिस्ट्री देख्न सकिन्छ भने अन्तिममा अभिनेता आशिफ शाहलाई पनि सप्राइजको रूपमा प्रस्तुत गरिएको छ। गीतको अडियो तथा भिडियो उत्कृष्ट बनेको भन्दै निर्माण टिमले यसको राम्रो प्रतिक्रिया आउने विश्वास व्यक्त गरेको छ।

यसअघि सिनेमा जेठ २३ गते प्रदर्शन हुने तय गरिएको भए पनि अब जेठ ९ गतेबाट नेपालभरका सिनेमा हलमा रिलिज हुने घोषणा गरिएको छ। निर्माता सन्तोष गौतमका अनुसार अभिनेता सौगात मल्लको अर्को फिल्म ‘भाइरल गोर्खे’ जेठ १६ गते प्रदर्शनमा आउने भएकाले दुई फिल्मबीच अन्तर राख्न प्रदर्शन मिति अगाडि सारिएको हो। निर्देशक सिमोस सुनुवारले यस सिनेमामा आफ्नो अघिल्लो प्रोजेक्टका कमजोरी सच्याउँदै दर्शकलाई उत्कृष्ट सिनेमाटोग्राफी र कथावस्तु प्रस्तुत गर्ने प्रयास गरेको बताए।

सिनेमाकी मुख्य अभिनेत्री गरिमा शर्माले आफू पहिलो पटक मुख्य भूमिकामा देखिन लाग्दा स्टेजमा चढ्दा डर लागेको अनुभव सुनाइन्। सौगात, आशिफ, र गरिमाका अलावा सिनेमामा रमा थपलिया, लोकेन्द्र लेखक, कमल देवकोटा, विशाल पहाडी, रुशा न्यौपाने, कुसुम शर्मा, स्नेहा जोशी, समापिका गौतम, कुशल गजमेर लगायतका कलाकारहरूको अभिनय रहेको छ । मुईन इन्टरटेनमेन्टको प्रस्तुति रहेको यो सिनेमा सामाजिक कमेडी कथावस्तुमा आधारित छ। कथा, पटकथा, र संवाद प्रदीप भारद्धाजले लेखेका हुन् भने सिनेमाका निर्माता सन्तोष गौतम हुन्।

हरि हुँमागाईले सिनेमाटोग्राफी, उत्तम हुँमागाईले सिनेमाटोग्राफी, सुनिल शिवभक्तिले सम्पादन, तथा **रोयल भिमसेन (ट्राइडेन्ट कन्सेप्ट टिम)**ले पोस्टर डिजाइन गरेको छ। सिनेमाको डिजिटल राइट्स जी टु वान डिजिटलले खरिद गरेको छ भने वितरण टिफल्क फिल्मस्ले गर्नेछ। अब हेर्न बाँकी छ, सौगात मल्ल र गरिमा शर्माको रोमान्टिक जोडीलाई दर्शकले कत्तिको रुचाउनेछन्!