मधेस सरकारमा मन्त्रिपरिषद् पुनर्गठन, जनमत पार्टीका दुई मन्त्री नियुक्त
सहयात्रा टिभी
काठमाडौं । जेठ ९, मधेस प्रदेश सरकारमा मन्त्रिपरिषद् पुनर्गठन गरिएको छ। बिहीबार जनमत पार्टीका तर्फबाट वसन्तकुमार कुशवाहा र सञ्जय यादवले मन्त्रीको पद तथा गोपनीयताको शपथ लिएका छन्। प्रदेश प्रमुख सुमित्रा सुवेदी भण्डारीले बिहीबार साँझ दुवै नवनियुक्त मन्त्रीलाई शपथ गराएकी हुन्।
पुनर्गठित मन्त्रिपरिषद् अनुसार, वसन्तकुमार कुशवाहा उद्योग, वाणिज्य तथा पर्यटन मन्त्री र सञ्जय यादव वन तथा वातावरण मन्त्रीमा नियुक्त भएका छन्। यसअघि कुशवाहाले प्रदेश सरकारको कृषिमन्त्रीको जिम्मेवारी सम्हालेका थिए भने यादव राज्यमन्त्री थिए।
मुख्यमन्त्री सतिशकुमार सिंहको नेतृत्वमा गठन भएको नयाँ मन्त्रिपरिषद् नेपालको संविधानको धारा १६८(९) अनुसार पुनर्गठित गरिएको हो। पुनर्गठित मन्त्रिपरिषद्मा अब १२ जना मन्त्रीहरू छन्, जसमा विभिन्न मन्त्रालयका जिम्मेवारी यसप्रकार रहेका छन् :
- मुख्यमन्त्री : सतिशकुमार सिंह
- गृह, सञ्चार तथा कानुनमन्त्री : राजकुमार लेखी
- भौतिक पूर्वाधार मन्त्री : सरोज यादव
- भूमि व्यवस्था, कृषि तथा सहकारीमन्त्री : जनार्दन सिंह क्षेत्री
- शिक्षा तथा संस्कृतिमन्त्री : रानी तिवारी
- स्वास्थ्य तथा जनसङ्ख्या मन्त्री : शत्रुधन सिंह
- अर्थमन्त्री : सुनिल यादव
- खेलकुद तथा समाज कल्याण मन्त्री : प्रमोद जयसवाल
- ऊर्जा, सिँचाइ तथा खानेपानी मन्त्री : शेषनारायण यादव
- श्रम तथा यातायात मन्त्री : कौशलकिशोर राय
- उद्योग, वाणिज्य तथा पर्यटन मन्त्री : वसन्तकुमार कुशवाहा
- वन तथा वातावरण मन्त्री : सञ्जयकुमार यादव
जनमत पार्टीका प्रवक्ता डा. शरद सिंह यादवले मन्त्रिपरिषद् पुनर्गठन नियमित कार्यप्रणालीअनुसार भएको जानकारी दिएका छन्। ‘उहाँहरूको कामको समीक्षा भयो, एक वर्ष मन्त्रालयमा रहनुभयो,’ उनले भने, ‘मधेस संसदीय दलको सहमतिमा केन्द्रले मन्त्री हेरफेर गर्न सहमति दिएको हो।’
हाल मधेस प्रदेशमा जनमत पार्टीका १३ जना सांसद रहेका छन्।
मन्त्रिपरिषद् पुनर्गठनसँगै मधेस प्रदेशमा सरकारको कार्यगत जिम्मेवारी थप स्पष्ट भएको छ। यसले प्रदेश सरकारलाई कार्यक्षमतामा थप सुदृढीकरण हुने अपेक्षा गरिएको छ।