ग्वार्को फ्लाइओभरको निरीक्षणमा मन्त्री दाहाल, जेठ मसान्तभित्र सञ्चालनमा ल्याउने तयारी

सहयात्रा टिभी

काठमाडौं । जेठ ११, काठमाडौँ उपत्यकाको व्यस्त चोकहरू मध्ये एक ललितपुरको ग्वार्कोमा निर्माणाधीन फ्लाइओभरको काम अन्तिम चरणमा पुगेको छ। आयोजनाले जेठ मसान्तभित्रै फ्लाइओभरमा सवारीसाधन सञ्चालन गर्न मिल्ने गरी तीव्र गतिमा काम भइरहेको जनाएको छ। यो फ्लाइओभर सञ्चालनमा आएपछि ग्वार्को चोकमा हुने घण्टौँको ट्राफिक जाम न्यूनीकरणमा महत्वपूर्ण भूमिका खेल्ने अपेक्षा गरिएको छ।

निर्माण कार्यको जिम्मा लिएको कम्पनीले भने जेठ १५ गतेभित्रै सम्पूर्ण निर्माण सम्पन्न गरी सरकारलाई हस्तान्तरण गर्ने लक्ष्य राखेको बताएको छ। हाल फ्लाइओभरको मुख्य संरचना निर्माण भइसकेको र फिनिसिङ तथा अन्य प्राविधिक कामहरू द्रुत गतिमा अघि बढाइएको आयोजनाले जनाएको छ।

यसैबीच, भौतिक पूर्वाधार तथा यातायात मन्त्री देवेन्द्र दाहालले आइतबार निर्माणाधीन ग्वार्को फ्लाइओभरको स्थलगत निरीक्षण गरेका छन् । निरीक्षणका क्रममा मन्त्री दाहालले निर्माण प्रगतिको विस्तृत जानकारी लिएका थिए। उनले तोकिएको समयसीमाभित्रै गुणस्तरीय काम सम्पन्न गर्न र फ्लाइओभर सञ्चालनमा ल्याउन सम्बन्धित आयोजना प्रमुख तथा निर्माण व्यवसायीलाई निर्देशन दिए ।

मन्त्री दाहालको निरीक्षणले आयोजनालाई समयमै सम्पन्न गर्न थप दबाब परेको र कामले थप गति लिने अपेक्षा गरिएको छ। फ्लाइओभर सञ्चालनमा आएपछि चक्रपथको ग्वार्को खण्डमा सवारी आवागमन सहज हुने, यात्रा समय घट्ने र इन्धन खपतमा पनि कमी आउने विश्वास लिइएको छ। यो काठमाडौँ उपत्यकाभित्र निर्माण सम्पन्न हुन लागेको पहिलो फ्लाइओभरमध्ये एक हो, जसले सहरी यातायात व्यवस्थापनमा नयाँ आयाम थप्नेछ।