एसियन कप छनोट : फराकिलो जितको लक्ष्यसहित नेपाल आज श्रीलंकासँग भिड्दै
सहयात्रा टिभी
काठमाडौं । असार १८, उज्बेकिस्तानमा जारी एएफसी महिला एसियन कप छनोट अन्तर्गत पहिलो खेलमा सानदार जित निकालेको नेपाली राष्ट्रिय महिला फुटबल टोलीले आज आफ्नो दोस्रो खेलमा श्रीलंकाको सामना गर्दैछ।
तास्केन्तस्थित बुनयोदकोर स्टेडियममा यो खेल नेपाली समय अनुसार साँझ सवा ६ बजे सुरु हुनेछ। पहिलो खेलमा लाओसमाथि ९-० को फराकिलो जित दर्ता गरेर उच्च मनोबलमा रहेको नेपालको लक्ष्य आज श्रीलंकाविरुद्ध जित निकाल्दै समूहको शीर्ष स्थानको दौडमा आफूलाई बलियो बनाउनु हो।
लाओस विरुद्धको खेल नेपालका लागि धेरै हिसाबले विशेष रह्यो। नेपाली महिला टोलीको १००औं अन्तर्राष्ट्रिय खेलको अवसरमा नयाँ कप्तानको रूपमा जिम्मेवारी सम्हालेकी सावित्रा भण्डारी ‘साम्बा’ले एक्लै चार गोल गर्दै आफ्नो नेतृत्व क्षमता प्रदर्शन गरिन्। यस्तै, टोलीका नवनियुक्त मुख्य प्रशिक्षक प्याट्रिक डि वाइल्डले पनि आफ्नो पहिलो खेलमै प्रभावशाली जितबाट सिनियर टोलीमा डेब्यु गरेका छन्। पहिलो खेलमा नियमित गोलकिपर एन्जिला तुम्बापो सुब्बालाई बेन्चमा राख्दै अन्जना राना मगरलाई अवसर दिनु र सरस्वती हमाललाई पहिलो रोजाइमै डेब्यू गराउनुले प्रशिक्षक वाइल्डले समूहको सबैभन्दा बलियो टोली उज्बेकिस्तान विरुद्धको अन्तिम खेलका लागि खेलाडीहरूको परीक्षण र रणनीतिक प्रयोग गरिरहेको संकेत गर्छ।
ऐतिहासिक रूपमा, नेपाल श्रीलंकाभन्दा निकै बलियो टोली हो। नेपालले हालसम्म श्रीलंकासँग खेलेका आठवटै खेलमा जित निकालेको छ, जुन कीर्तिमानले आजको खेलमा नेपाली खेलाडीलाई थप मनोवैज्ञानिक लाभ दिनेछ। फिफा वरीयतामा पनि नेपाल (१००औं) श्रीलंका (१५९औं) भन्दा निकै अगाडि छ।
यस छनोटमा नेपालको मुख्य चुनौती घरेलु टोली उज्बेकिस्तान हो, जसले आफ्नो पहिलो खेलमा श्रीलंकालाई १०-० को फराकिलो अन्तरले पराजित गरेको थियो। यस नतिजाले समूहको अंकगणितलाई थप रोचक बनाएको छ। समूहको शीर्ष टोली मात्र एसियन कपका लागि छनोट हुने भएकाले नेपालका लागि आजको खेलमा जित मात्र पर्याप्त नहुन सक्छ; गोलअन्तरले पनि अन्तिम छनोटमा निर्णायक भूमिका खेल्नेछ। तसर्थ, नेपाललाई जितका साथै सकेसम्म धेरै गोल गर्ने दबाब हुनेछ। यदि आज नेपाल र उज्बेकिस्तान दुवै विजयी भएमा समूहको अन्तिम खेल यी दुई टोलीबीच ‘फाइनल’ सरह हुनेछ, जसको विजेताले आगामी वर्ष अस्ट्रेलियामा हुने प्रतिष्ठित महिला एसियन कपमा आफ्नो स्थान सुरक्षित गर्नेछ।