रुपन्देही-३ उपनिर्वाचन : रास्वपाले आज उम्मेदवार घोषणा गर्दै
सहयात्रा टिभी
काठमाडौं । भदौ १५, राष्ट्रिय स्वतन्त्र पार्टी (रास्वपा)ले रुपन्देही क्षेत्र नम्बर ३ मा हुने उपनिर्वाचनका लागि आज आफ्नो उम्मेदवारको नाम सार्वजनिक गर्ने भएको छ । दिउँसो साढे १ बजे बस्ने पार्टी सचिवालय बैठकपछि उम्मेदवारको टुंगो लाग्ने रास्वपाले जनाएको छ ।
रास्वपाले आकांक्षीहरूमध्येबाट उम्मेदवार चयन गर्न गत भदौ १२ गते अनलाइन माध्यमबाट प्राथमिक निर्वाचन (प्राइमेरी इलेक्सन) सम्पन्न गरेको थियो । सोही निर्वाचनमा सबैभन्दा बढी मत प्राप्त गर्ने व्यक्तिलाई उम्मेदवार बनाइने बताइएको छ ।
उपनिर्वाचनका लागि सुलभ खरेल, डा. लेखजंग थापा, ज्ञानु पौडेल, जितबहादुर गुप्ता, मधुप्रसाद अर्याल, पार्थिवेन्द्र उपाध्याय, कुसुम महर्जन, पुनमकुमारी अग्रवाल र रचना क्षेत्री गरी ९ जनाले आकांक्षा देखाएका छन्, जसमध्ये सुलभ खरेलको नाम बढी चर्चामा छ ।
उम्मेदवार घोषणा हुनुअघि आज बिहान ९ बजे सबै आकांक्षीहरूले पार्टी सभापति रवि लामिछानेलाई सामूहिक भेटघाट गर्ने कार्यक्रम रहेको छ ।
रुपन्देही क्षेत्र नम्बर ३ बाट निर्वाचित राष्ट्रिय प्रजातन्त्र पार्टी (राप्रपा) का सांसद दीपक बोहोराको निधन भएपछि उक्त क्षेत्रमा उपनिर्वाचन हुन लागेको हो । निर्वाचन आयोगले आगामी कात्तिक १७ गतेका लागि उपनिर्वाचनको मिति तोकेको छ ।