काठमाडौं उपत्यकामा जनजीवन सामान्य बन्दै, निषेधाज्ञा र कर्फ्यू हट्यो

सहयात्रा टिभी

काठमाडौं । भदौ २८, ‘जेनजी’ आन्दोलन र त्यसपछिको राजनीतिक संकटपछि काठमाडौं उपत्यकामा लगाइएको निषेधाज्ञा तथा कर्फ्यू हटेसँगै जनजीवन सामान्य बन्दै गएको छ । केही दिनदेखि सुरक्षाको नेतृत्व गरिरहेको नेपाली सेनाले जिम्मेवारी स्थानीय प्रशासनलाई हस्तान्तरण गरेपछि उपत्यकाका तीनवटै जिल्ला प्रशासन कार्यालयले निषेधाज्ञा र कर्फ्यू हटाउने निर्णय गरेका हुन् ।

पछिल्लो राजनीतिक उथलपुथल र ‘जेनजी’ आन्दोलनका क्रममा सुरक्षा अवस्था जटिल बनेपछि भदौ २४ गते रातिदेखि उपत्यकाको सुरक्षा व्यवस्था नेपाली सेनाले सम्हालेको थियो । सेनाले अवस्थालाई नियन्त्रणमा लिन निषेधाज्ञा र कर्फ्यू आदेश जारी गरेको थियो, जसलाई शनिबारदेखि हटाइएको हो ।

काठमाडौंका प्रमुख जिल्ला अधिकारी छविलाल रिजालको अध्यक्षतामा शनिबार बिहान बसेको जिल्ला सुरक्षा समितिको बैठकले सुरक्षा अवस्था सामान्य बन्दै गएको निष्कर्ष निकालेको छ । बैठकको सिफारिसअनुसार शनिबारका लागि जारी गरिएको निषेधाज्ञा र कर्फ्यूका आदेशहरू स्थगित गरिएको छ । यद्यपि, जिल्लाका केही संवेदनशील स्थानहरूमा भने साउन २४ गते जारी भएको निषेधाज्ञालाई निरन्तरता दिइएको छ ।

यसैगरी, ललितपुर र भक्तपुरमा पनि लगाइएको कर्फ्यू र निषेधाज्ञा पूर्ण रूपमा हटाइएको छ । ललितपुरका प्रमुख जिल्ला अधिकारी सुमन घिमिरे र भक्तपुरका प्रमुख जिल्ला अधिकारी नमराज घिमिरेले आ-आफ्नो जिल्लामा लगाइएका सबै प्रतिबन्धहरू हटाइएको पुष्टि गरेका छन् ।

निर्णयसँगै काठमाडौं उपत्यकाका चोक, बजार तथा सार्वजनिक स्थलहरूमा चहलपहल बढेको छ । सडकमा निजी तथा सार्वजनिक सवारी साधनहरू चल्न थालेका छन्, जसले नागरिकको दैनिक जीवनमा सहजता ल्याएको छ । राजनीतिक निकास र सुरक्षाको जिम्मा स्थानीय प्रशासनले लिएपछि उपत्यकामा शान्ति र स्थायित्व फर्किने अपेक्षा गरिएको छ ।