रास्वपा र विवेकशील साझा पार्टी एक हुँदै, भोलि घोषणा सभा गरिने
सहयात्रा टिभी
काठमाडौं । मंसिर १३ , राष्ट्रिय स्वतन्त्र पार्टी (रास्वपा) र विवेकशील साझा पार्टीबीच पार्टी एकता हुने भएको छ। विवेकशील साझा पार्टीले राखेको एकीकरणको प्रस्तावलाई रास्वपाले स्वीकार गरेपछि दुई पार्टी एक हुने पक्का भएको हो।
रास्वपाका प्रवक्ता मनिष झाका अनुसार, दुई पार्टीबीचको एकतालाई औपचारिक रूप दिन मंसिर १४ गते आइतबार काठमाडौँको राष्ट्रिय सभागृहमा ‘एकता घोषणासभा’ आयोजना गरिनेछ। रास्वपाको केन्द्रीय समिति बैठकले यो निर्णय गरेको हो।
रास्वपाले देशमा राम्रो शासन (सुशासन) र विकास चाहने तथा विचार मिल्ने अन्य दलहरूसँग पनि सहकार्य गर्ने नीति लिएको छ। प्रवक्ता झाका अनुसार, यस्ता दलहरूसँग छलफल गर्न र सहकार्य अघि बढाउन पार्टीले ‘सङ्घीय नेतृत्व मञ्च’ नामको संयन्त्र तयार पारेको छ, जसलाई केन्द्रीय समितिले अनुमोदन गरेको छ।