एमालेलाई बलियो बनाउने गरी प्रतिनिधि छान्न गोकर्ण विष्टको आग्रह
सहयात्रा टिभी
काठमाडौं । मंसिर १३ , नेकपा एमालेका सचिव गोकर्ण विष्टले पार्टीको आसन्न महाधिवेशनका लागि प्रतिनिधि छनोट गर्दा गम्भीर र जिम्मेवार बन्न कार्यकर्ताहरूलाई आग्रह गरेका छन्। मङ्सिर २७ गतेदेखि सुरु हुने महाधिवेशनले पार्टीलाई नयाँ गति दिने विश्वाससहित उनले यो आग्रह गरेका हुन्।
नेतृत्वमा केपी ओलीको विकल्प खोज्नुपर्ने पक्षमा देखिएका विष्टले अहिले देशमा देखा परेको जटिल परिस्थितिलाई सामना गर्न सक्ने नेतृत्व आवश्यक रहेको बताएका छन्। उनले पार्टीलाई अझ बलियो, एकताबद्ध र जनताको विश्वास जित्न सक्ने बनाउनुपर्नेमा जोड दिएका छन्।
समयको माग र आम जनता तथा कार्यकर्ताको चाहनाअनुसार पार्टीलाई पुनर्गठन गरेर अघि बढाउन सक्ने खालका प्रतिनिधिहरू देशभरबाट चयन हुनेमा आफू विश्वस्त रहेको विष्टले बताएका छन्।
उनले भनेका छन्, ‘हामीले यति बेला देशमा देखा परेको विषम परिस्थितिलाई सम्बोधन गर्ने र पार्टीलाई थप गति, ऊर्जा, एकताका साथ जनताको विश्वास आर्जन गर्नेगरि बलियो बनाउनु पर्नेछ । यसका लागि समयको माग अनि आम जनता र कार्यकर्ताको चाहना अनुसार पार्टीलाई पुनर्गठन गरेर अघि बढाउने गरी प्रतिनिधि चयनमा जिम्मेवार पूर्ण भूमिका खेल्नुहुनेछ भन्ने विश्वास राखेको छु ।’