विभिन्न प्रदेशमा मेघगर्जनसहित हल्का वर्षा र हिमपातको सम्भावना

सहयात्रा टिभी

काठमाडौं । फागुन २६, हाल नेपालको मौसममा तीनवटा छुट्टाछुट्टै प्रणालीको आंशिक प्रभाव परेको छ। जल तथा मौसम विज्ञान विभागको मौसम पूर्वानुमान महाशाखाका अनुसार पश्चिमी वायु, उपल्लो वायुमण्डलको उच्चचापीय प्रणाली र पूर्वी भू-भाग नजिक तल्लो वायुमण्डलमा रहेको न्यूनचापीय क्षेत्रका कारण मौसम प्रभावित भएको हो।

यिनै प्रणालीको प्रभावका कारण मंगलबार दिउँसो देशभर साधारणतया बदली (बादल लाग्ने) रहने महाशाखाले जनाएको छ। दिउँसोको समयमा कोशी, वाग्मती, गण्डकी र लुम्बिनी प्रदेशका पहाडी तथा हिमाली भू-भागका थोरै स्थानहरूमा मेघगर्जन र चट्याङसहित हल्का वर्षा र हिमपातको सम्भावना रहेको छ। त्यसैगरी, कर्णाली र सुदूरपश्चिम प्रदेशका पहाडी तथा हिमाली भू-भाग र लुम्बिनी प्रदेशको तराई क्षेत्रका एक-दुई स्थानमा पनि यस्तै प्रकारको मौसमी गतिविधि (वर्षा र हिमपात) हुन सक्ने अनुमान गरिएको छ।

मंगलबार रातिको मौसम पनि यस्तै प्रकृतिको रहनेछ। राति गण्डकी र लुम्बिनी प्रदेशसहित देशका अधिकांश पहाडी र हिमाली भू-भागमा साधारणतया बदली रहनेछ भने बाँकी क्षेत्रमा आंशिक मात्र बादल लाग्नेछ।

रातिको समयमा पनि कोशी, वाग्मती, गण्डकी र लुम्बिनी प्रदेशका पहाडी तथा हिमाली क्षेत्रका साथै लुम्बिनी प्रदेशको तराई भू-भागका एक-दुई स्थानमा मेघगर्जन र चट्याङसहित हल्का वर्षा र हिमपात हुने सम्भावना रहेको महाशाखाले बुलेटिनमार्फत जानकारी दिएको छ।