अमेरिकाले मध्यपूर्वमा एक हजार सैनिक पठाउँदै, सम्पूर्ण शक्ति जुटाउँदै ट्रम्प

सहयात्रा टिभी

काठमाडौं । चैत्र ११, ट्रम्प प्रशासनले इरानसँगको द्वन्द्व अन्त्यका लागि वार्ता भइरहेको बताइरहँदा अमेरिकाले मध्यपूर्वमा आफ्नो सैन्य उपस्थिति थप बलियो बनाउन लागेको छ। अमेरिकी सेनाको चर्चित ‘८२औँ एयरबोर्न डिभिजन’का करिब १,००० सैनिकहरू आगामी केही दिनभित्रै मध्यपूर्वमा परिचालन हुने तयारीमा रहेको समाचार स्रोतहरूले जनाएका छन्।

यस टोलीको नेतृत्व ८२औँ एयरबोर्न डिभिजनका कमाण्डर मेजर जनरल ब्रान्डन टेगमेयरले गर्नेछन्। टोलीमा डिभिजनका कर्मचारीहरूका साथै पहिलो ब्रिगेड कम्ब्याट टिमको एउटा बटालियन समावेश छ, जसले हाल ‘इमिडिएट रेस्पोन्स फोर्स’ को रूपमा काम गरिरहेको छ। स्रोतका अनुसार डिभिजन स्टाफ र बटालियनका प्रारम्भिक टोलीहरू एक हप्ताभित्रै प्रस्थान गर्नेछन्। ब्रिगेडका अन्य टोलीहरू पनि पछि परिचालन हुन सक्ने बताइएको छ।

यो ब्रिगेडलाई मध्यपूर्वमा ‘तयारी अवस्थाको इकाई’ का रूपमा राखिनेछ, जसलाई आवश्यकता पर्नासाथ परिचालन गर्न सकिनेछ। यसअघि सन् २०२० मा इरानी कमाण्डर कासिम सुलेमानीको हत्यापछि उत्पन्न तनावका बेला पनि ८२औँ एयरबोर्न डिभिजनलाई यसैगरी परिचालन गरिएको थियो। आईआरएफ एउटा यस्तो विशेष फौज हो जुन छोटो सूचनाका आधारमा केही घण्टाभित्रै विश्वको जुनसुकै कुनामा खटिन सक्छ।

सैनिक परिचालनको आधिकारिक आदेश आउन बाँकी भए पनि यो प्रक्रिया अन्तिम चरणमा पुगेको बुझिएको छ।

यो सैन्य तयारी यस्तो समयमा भइरहेको छ, जतिबेला अमेरिका र इरानबीच कूटनीतिक संवादका समाचारहरू बाहिर आएका छन्। सोमबार राष्ट्रपति डोनाल्ड ट्रम्पले अमेरिका र इरानबीच द्वन्द्व अन्त्यका लागि १५ बुँदे सहमति भएको र इरान सम्झौताका लागि “धेरै इच्छुक” रहेको दाबी गरेका थिए।

इरानले सुरुमा अमेरिकासँग कुनै पनि वार्ता भइरहेको कुरालाई अस्वीकार गरे पनि मंगलबार इरानी स्रोतले सीएनएनलाई दुई देशबीच “सम्पर्क” भइरहेको पुष्टि गरेको छ। इरानले “दिगो प्रस्ताव” आएमा वार्ता गर्न तयार रहेको संकेत दिएको छ।

८२औँ एयरबोर्न बाहेक अमेरिकाले समुद्रमार्फत पनि ठूलो शक्ति परिचालन गरेको छ। दुईवटा ‘मरिन एक्सपिडिसनरी युनिट’ र ‘एम्फिबियस रेडी ग्रुप’ लाई पनि मध्यपूर्व पठाइएको छ।

इन्डो-प्यासिफिक क्षेत्रमा रहेका ११औँ र ‘बक्सर’ एम्फिबियस रेडी ग्रुपलाई मार्ग परिवर्तन गरी मध्यपूर्व पठाइएको छ भने ३१औँ एमईयु र ‘त्रिपोली’ एम्फिबियस रेडी ग्रुप पनि परिचालन भइसकेका छन्। यी प्रत्येक समूहमा करिब ४,५०० मरिन र जलसैनिकहरू रहेका छन्, जसले हवाई र स्थलगत दुवै क्षेत्रमा ठूलो सैन्य क्षमता राख्दछन्।

कूटनीतिक प्रयासहरू जारी रहे पनि सैन्य उपस्थितिको यो बढोत्तरीले मध्यपूर्वमा अमेरिकाले कुनै पनि परिस्थितिको सामना गर्न उच्च सतर्कता अपनाएको देखाउँछ।