कालीगण्डकीको बाढीले पर्वतको फर्सेमा बगायो २५ घर
सहयात्रा टिभी
काठमाडौँ । असोज ११, कालीगण्डकी नदी उर्लिएर बस्तीमा पस्दा पर्वतको जलजला गाउँपालिका–८ फर्सेका २५ घर बगेका छन्। आइतबार बिहान करिब ८ बजे नदीको बहाव एक्कासि बस्तीतिर सोझिएपछि ती घरहरू बगेका हुन्।
प्रहरीका अनुसार करिब ८० घरधुरी रहेको उक्त बस्तीमा बाढी पसेपछि २५ वटा घर बगाएको छ भने बाँकी घरहरू पनि तीव्र कटान र जोखिममा परेका छन्।
बाढी पस्न थालेलगत्तै स्थानीय बासिन्दालाई सुरक्षित स्थानमा सारिएका कारण ठूलो मानवीय क्षति हुनबाट जोगिएको छ। हालसम्म घटनामा कसैको पनि ज्यान नगएको प्रहरीले स्पष्ट पारेको छ।
यता, सडकमा खसेको पहिरोका कारण उद्धार टोलीलाई घटनास्थल पुग्न कठिनाइ भइरहेको छ। घटनास्थल मिलनचोकस्थित प्रहरी चौकीबाट करिब ६ किलोमिटर पूर्वतर्फ पर्छ।
पहिरो पन्छाएर घटनास्थलसम्म पुग्ने प्रयास भइरहेको र घटनाको थप विवरण संकलन भइरहेको प्रहरीले जनाएको छ।