एमाले अध्यक्ष ओलीको घरको गेटमा एकाबिहानै बम विस्फोट
सहयात्रा टिभी
काठमाडौं । नेकपा एमाले अध्यक्ष केपी ओलीको झापा, दमकस्थित घरको गेटमा आज एकाबिहानै बम विष्फोट गराइएको छ । बिहान ४ बजेतिर दमक नगरपालिका–५ मा रहेको ओलीको घरको पूर्वी गेटमा विस्फोट भएको हो ।
विस्फोटबाट गेटमा सामान्य क्षति भएको छ । यस्तै त्यहिँ नजिकै अर्को विस्फोटक पदार्थ पनि भेटिएको छ । बम डिस्फोजल टोलीले विस्फोटक पदार्थ निष्क्रिय पार्दैछ ।
यस्तै, झापामै निर्वाचन क्षेत्र नम्बर २ का प्रतिनिधिसभाका उम्मेदवार एवं नेपाली कांग्रेस झापाका सभापति उद्धव थापाको घरमा गएराति बम विस्फोट गराइएको छ । अर्जुनधारा नगरपालिका–७ मा रहेको थापाको घरको परिसरमा विस्फोट भएको प्रहरीले जनाएको छ ।
विस्फोटका कारण थापाको चुनाव प्रचारमा प्रयोग गरिएको बा ७ च ६८९५ नम्बरको गाडीमा क्षति पुगेको छ । विस्फोटका कारण मानिसलाई भने केही नभएको प्रहरीले जनाएको छ ।
उता, सर्लाही पनि कांग्रेस उम्मेदवार शम्भुलाल श्रेष्ठको घरमा पनि बम विष्फोट गराइएको छ । पशुपन्छी राज्यमन्त्रीसमेत रहेका श्रेष्ठको घरमा गराइएको विष्फोटबाट घरको कम्पाउण्डमा क्षति भएको छ ।