सभाको अध्यक्षता गर्ने व्यक्तिलाई समान बन्देज लाग्ने दाबी : कानुन व्यवसायी
सहयात्रा टिभी
काठमाडौं । भदौ १८, कोशीका मुख्यमन्त्री उद्धव थापाको विश्वासको मतसम्बन्धी विवादमा रिट निवेदकका कानुन व्यवसायीले सभामुख र सभाको अध्यक्षता गरिरहेका व्यक्तिको पदीय हैसियत र दायित्व एउटै हुने जिकिर गरेका छन् ।
४ भदौमा कोशी प्रदेश सभामा मुख्यमन्त्री थापाले विश्वासको मतसम्बन्धी प्रस्ताव राख्दा अध्यक्षताा गरेका कांग्रेस सांसद इस्राइल मन्सुरीले मत दिएका थिए ।
त्यसविरुद्ध एमाले संसदीय दलका नेता हिक्मतकुमार कार्कीले दिएको रिट निवेदनको तर्फतबाट बहस गरेका कानुन व्यवसायीले सभाको अध्यक्षता गर्ने व्यक्तिको कानुनी हैसियत, अधिकार र दायित्व सभामुखकै जस्तो हुने बताएका हुन् ।
मुख्यमन्त्री थापा र सभाध्यक्ष गरेका मन्सुरीलगायत विपक्षीले आफ्नो लिखित जवाफमा सभाको अध्यक्षता गर्नेलाई सभामुख सरहको तटस्थताको बन्देज नलाग्ने दावी गरेका थिए ।
मन्सुरीले सभाको अध्यक्षता गरेपनि आफूलाई पार्टीको ह्विप लाग्ने भएकाले विश्वासको मत दिएको दाबी गरेका थिए ।
सोमबार न्यायाधीशहरु सपना प्रधान मल्ल, डा. कुमार चुडाल र नहकुल सुवेदीको पूर्ण इजलासमा कानुन व्यवसायीहरुले उक्त तर्कको प्रतिवाद गर्दै सभामुख र सभाको अध्यक्षता गर्ने व्यक्तिलाई समान बन्देज लाग्ने दाबी गरे ।
वरिष्ठ अधिवक्ता टीकाराम भट्टराईले प्रदेशसभामा कुनै प्रस्तावमाथि मत बराबर भएको अवस्थामा बाहेक अध्यक्षता गर्ने व्यक्तिलाई मत दिने अधिकार नहुने दावी गरे ।