नवलपुरको जंगलमा सासू बुहारी मृत फेला

सहयात्रा टिभी

पोखरा । पुस ९, नवलपुरको जंगलमा घाँस काट्न गएका सासू बुहारी मृत फेला परेका छन् । नवलपुर विनयी त्रिवेणी गाउँपालिका-१ को विनय सामुदायिक वनमा घाँस काट्न गएका सासू ६० वर्षीया मनादेवी पौडेल र बुहारी २८ वर्षीया विष्णु पौडेल आइतबार राति मृत फेला परेको जिल्ला प्रहरी कार्यालय नवलपुरले जनाएको छ ।

सासू बुहारी आइतबार बिहान ११ बजे घाँस काट्न घर नजिकैको जंगलमा गएका थिए । साँझसम्म पनि घर नफर्किएपछि खोजतलास गर्दा आइतबार राति दुवै जनाको शव खहरे ढिक जंगलमा मृत फेला परेको नवलपुर प्रहरीका डिएसपी वेदबहादुर पौडेलले जानकारी दिए । दुवैको बायाँ कम्परा र कम्परा पछाडि चोट देखिएको छ ।

कम्परमा चोट लागेको र घटनाको प्रकृति हेर्दा जंगली जनावरले आक्रमण गरेको हुन सक्ने डिएसपी पौडेलले बताए । ‘घटना हेर्दा जंगली जनावरले आक्रमण गरेको अनुमान गर्न सकिन्छ । तर, पोष्टमार्टम रिपोर्ट नआएसम्म केहि भन्न सकिँदैन,’ उनले भने । दुवै शवलाई पोस्टमार्टमका लागि जिल्ला अस्पताल पठाइएको प्रहरीले जनाएको छ ।