टी- २० विश्वकपको पहिलो खेल: क्यानडामाथि अमेरिकाको शानदार जित
सहयात्रा टिभी
काठमाडौं । जेठ २०, अमेरिका र वेष्टइण्डिजमा सुरु भएको टी-२० विश्वकप क्रिकेटको पहिलो खेलमा घरेलु टोली अमेरिकाले क्यानडालाई ७ विकेटले पराजित गरेको छ । क्यानडाले दिएको १९५ रनको लक्ष्य अमेरिकाले १७ ओभर ४ बलमा ३ विकेट गुमाएर पूरा गर्यो । अमेरिकाका आरोन जोन्सले सर्वाधिक अविजित ९४ रन जोडे ।
४२ रनमा २ विकेट गुमाएको अमेरिकाको लागि जोन्स र एन्ड्रीस गौसले तेस्रो विकेटका लागि १३१ रनको साझेदारी गरेका थिए । गौस ६५ रन जोडे । मोनक पटेलले १६, स्टेभेन टलर शुन्य रनमा आउट भए । कोरे एण्डरसन ३ रनमा अविजित रहे । बलिङमा क्यानडाका सलिम साना, डिलोन हेलिगर र निखिल दत्तले एक एक विकेट लिए ।
यसअघि अमेरिकाको डालसस्थित ग्राण्ड प्रेरी क्रिकेट मैदानमा टस हारेर पहिला ब्याटिङको निम्तो पाएको क्यानडाले निर्धारित २० ओभरमा ५ विकेट गुमाएर १९४ रन बनाएको थियो । क्यानडाका लागि नवनित धलिवालले ६१, निकोलस किर्तोनले ५१, आरोन जोनसनले २३, पर्गत सिंहले ५, दिलप्रीत बाज्वाले ५, श्रेयास मोभ्भाले ३२ र डिलोन हेलिगरले १ रनको योगदान दिएका थिए । बलिङमा अमेरिकाका अलि खान, हर्मित सिंह र कोरे एण्डरसनले एकएक विकेट लिएका हुन् ।