त्रिकोणात्मक सिरिज- नेपाल र नेदरल्यान्ड्स खेल्दै
सहयात्रा टिभी
काठमाडौं । माघ १७, नेपाली महिला क्रिकेट टोलीले आज नेदरल्याण्ड्ससँग खेल्दै त्रिकोणात्मक टि ट्वान्टी आई सिरिजको सुरुवात गर्दैछ ।
कीर्तिपुरस्थित टियु मैदानमा हुने त्रिकोणात्मक सिरिजमा घरेलु टोलीको इतिहासमा नै पहिलो पटक नेदरल्याण्ड्सको सामना गर्दैछ । खेल दिउँसो १२ः१५ बजे सुरु हुनेछ ।
घरेलु मैदानमा नेपालले दोस्रो पटक टि ट्वान्टी आई सिरिज खेल्न लागेको हो । यसअघि सन् २०२२ को मेमा युगान्डासँग ५ खेलको टि ट्वान्टी आई सिरिज खेलेको थियो ।
सिरिजमा नेपाल र नेदरल्याण्ड्सका साथै थाइल्याण्डको सहभागिता छ । महिला टि ट्वान्टी आई वरियतामा नेपाल २०औं, थाइल्याण्ड १३ औं रनेदरल्याण्ड्स १६औं स्थानमा छ ।
सिरिजमा सहभागी टोलीले एकअर्कासँग समान ३ पटक खेल्नेछन् । अंक तालिकाको शीर्ष स्थानमा रहने टोली विजेता बन्नेछ ।
नेपाली टोलीमा कप्तान बर्मासहित रुविना क्षेत्री, सीता राना मगर, पूजा महतो, विन्दु रावल, रेवती धामी, कविता कुँवर, सम्झना खड्का, ममता चौधरी, राजमती ऐरी, कविता जोशी, एलिसाकुमारी यादव, रोमा थापा, मनिषा उपाध्याय र ईश्वरी विष्ट रहेकी छन् ।
नेपाल क्रिकेट सङ्घ (क्यान) ले टी-२० शृङ्खलाको ट्रफी बुधबार काठमाडौँमा आयोजना गरेको पत्रकार सम्मेलनमा सार्वजनिक गरेको छ । शृङ्खला माघ २५ गतेसम्म सञ्चालन हुनेछ ।
सिरिजमा नेपाली टोलीको खेलतालिका
३० जनवरी (माघ १७ गते) – नेदरल्याण्ड्ससँग
१ फेब्रुअरी (माघ १९ गते) – थाइल्याण्डसँग
२ फेब्रुअरी (माघ २० गते) – नेदरल्याण्ड्ससँग
४ फेब्रुअरी (माघ २२ गते ) – थाइल्याण्डसँग
५ फेब्रुअरी (माघ २३ गते) – नेदरल्याण्ड्ससँग
७ फेब्रुअरी (माघ २५ गते)– थाइल्याण्डसँग