प्रतिनिधिसभा बैठक बस्दै, विपक्षीलाई मनाउने प्रयास जारी

सहयात्रा टिभी

काठमाडौं । जेठ २६, संघीय संसद् अन्तर्गतको प्रतिनिधिसभाको बैठक आज (सोमबार) दिउँसो २ बजे बस्दै छ । यद्यपि, प्रमुख प्रतिपक्षी दलको निरन्तरको अवरोधका कारण बैठक सञ्चालन हुन सकेको छैन र आज पनि बैठक अघि बढ्नेमा अनिश्चितता छ ।

संसद् सचिवालयले आजको बैठकका लागि सम्भावित कार्यसूची सार्वजनिक गरेको छ । जसअनुसार, उपप्रधान तथा अर्थमन्त्री विष्णुप्रसाद पौडेलले आर्थिक वर्ष २०८१/८२ को राजस्व र व्ययको वार्षिक अनुमान (बजेट) माथि सामान्य छलफल प्रारम्भ गर्न प्रस्ताव प्रस्तुत गर्ने सबैभन्दा महत्त्वपूर्ण कार्यसूची रहेको छ ।

यसका साथै, राज्य व्यवस्था तथा सुशासन समितिका सभापति रामहरि खतिवडाले ‘संघीय निजामती सेवा विधेयक सम्बन्धी समितिको प्रतिवेदन, २०८०’ पेस गर्ने कार्यक्रम छ । बैठकको सुरुमा सभामुखले प्रधानमन्त्री तथा मन्त्रिपरिषद्को कार्यालयबाट प्राप्त पत्रहरूको बेहोरा पढेर सुनाउने कार्यसूची पनि तय गरिएको छ ।