ट्रम्पको युद्धविराम प्रस्तावमा इजरायल सहमत

सहयात्रा टिभी

काठमाडौं । असार १०, अमेरिकी राष्ट्रपति डोनाल्ड ट्रम्पले युद्धविरामका लागि गरेको प्रस्तावलाई इजरायलले स्वीकार गरेको छ। इजरायलका प्रधानमन्त्री बेन्जामिन नेतन्याहूले एक विज्ञप्तिमार्फत ट्रम्पको युद्धविराम प्रस्ताव स्वीकार गरेको जानकारी दिएका हुन् । राष्ट्रपति ट्रम्पले युद्धविराम लागू भइसकेको र दुवै पक्षलाई यसको उल्लंघन नगर्न आग्रह गरेपछि नेतन्याहूको यस्तो भनाइ आएको हो।

विज्ञप्तिमा अगाडि भनिएको छ कि पछिल्लो दिन इजरायली सेनाले “तेहरानको मुटुमै रहेका सरकारी निशानाहरूमाथि गम्भीर आक्रमण गरी सयौं बासिज कार्यकर्ताहरूलाई सफाया गरेको छ” – बासिज एक मिलिसिया हो जसलाई इरानी सरकारले प्रायः प्रदर्शनहरू दमन गर्न प्रयोग गर्छ – र “एक अर्का वरिष्ठ आणविक वैज्ञानिकलाई पनि मारेको छ।”

“रक्षामा सहयोग र इरानी आणविक खतरा उन्मूलनमा सहभागिताका लागि इजरायल राष्ट्रपति ट्रम्प र संयुक्त राज्य अमेरिकालाई धन्यवाद दिन्छ,” विज्ञप्तिमा थप भनिएको छ।

यो घोषणा हुनुभन्दा ठीक अघि इरानले इजरायलमाथि कैयौं पटक क्षेप्यास्त्र (मिसाइल) प्रहार गरेको थियो । जसका कारण दक्षिणी सहर बेर्शेबामा कम्तीमा चार जनाको मृत्यु भएको थियो।

यसअघि इरानका विदेशमन्त्री अब्बास अरागचीले इजरायलसँग युद्धविरामको कुनै सम्झौता नभएको बताएका थिए। तर, उनले यदि इजरायलले आफ्नो “गैरकानुनी आक्रमण” स्थानीय समयअनुसार बिहान ४ बजेसम्म रोकेमा तेहरान (इरान) पनि आक्रमण गर्न बन्द गर्ने शर्त राखेका थिए ।

अमेरिकाले एक दिनअघि इरानको परमाणु केन्द्रहरूमा गरेको हमलाको बदला लिन इरानले सोमबार साँझ कतारमा रहेको अमेरिकी सैनिक अखडामा पनि क्षेप्यास्त्र प्रहार गरेको थियो ।

इरानका अनुसार, जुन १३ मा इजरायलले आक्रमण सुरु गरेदेखि हालसम्म १३ जना बालबालिकासहित ४०० भन्दा बढी मानिस मारिएका छन् भने कम्तीमा ३,०५६ जना घाइते भएका छन्। उता, इरानको हमलामा इजरायलमा पनि कम्तीमा २४ जनाको ज्यान गएको छ।