महाधिवेशनको विवाद मिलाउन सभापति देउवा र पदाधिकारीबीच आज छलफल हुँदै
सहयात्रा टिभी
काठमाडौं । मंसिर १३ , नेपाली कांग्रेसभित्र महाधिवेशन कहिले गर्ने भन्ने विषयमा देखिएको विवाद समाधान गर्न आज पार्टी सभापति शेरबहादुर देउवासँग शीर्ष पदाधिकारीको छलफल हुने भएको छ । यसका लागि कार्यवाहक सभापति पूर्णबहादुर खड्का तथा महामन्त्रीद्वय गगन थापा र विश्वप्रकाश शर्मा सभापति देउवालाई भेट्न जान लागेका हुन् ।
महाधिवेशनसम्बन्धी अन्योल चिर्न कार्यवाहक सभापति खड्का र दुई महामन्त्रीले आज तेस्रो दिन पनि छलफललाई निरन्तरता दिन लागेका हुन् । उनीहरूबीच आज दिउँसो २ बजे सभापति देउवा बस्दै आएको महाराजगञ्जस्थित निवासमा कुराकानी हुने तय भएको छ ।
अहिले कांग्रेसमा महाधिवेशनको कार्यतालिका ल्याउने विषयमा सहमति जुट्न सकेको छैन । देउवा पक्षका अन्य शीर्ष नेताहरू प्रतिनिधिसभा निर्वाचनपछि मात्र महाधिवेशन गर्नुपर्ने पक्षमा छन् भने सभापति देउवा आफैँ चाहिँ आगामी पुसमा महाधिवेशन गर्न सकिने मनस्थितिमा देखिएका छन् । यता, दुई महामन्त्रीले भने नियमित महाधिवेशन सम्भव नभए ‘विशेष महाधिवेशन’ गरेर भए पनि निकास दिनुपर्ने अडान राख्दै आएका छन् ।
महाधिवेशन निर्वाचन अघि गर्ने कि पछि गर्ने भन्ने यही विवादका कारण गत असोज २८ गतेदेखि सुरु भएको केन्द्रीय कार्यसमिति बैठकले कुनै निर्णय गर्न सकेको छैन । कार्यवाहक सभापति खड्काले सहमतिका लागि भन्दै केन्द्रीय समिति बैठक स्थगित गरेर शीर्ष तहमा निरन्तर छलफल चलाइरहे पनि हालसम्म निकास निस्कन सकेको छैन ।