इरानी महिला फुटबल टिमलाई अस्ट्रेलियाले दियो भिसा

सहयात्रा टिभी

काठमाडौं । फागुन २६, एसियन कपबाट बाहिरिएपछि इरानी महिला फुटबल टोलीका पाँच सदस्यलाई अस्ट्रेलियामा मानवीय भिसा प्रदान गरिएको छ।

सोमबार ट्रम्पले अस्ट्रेलियालाई ती महिला फुटबल टोलीलाई “शरण दिन” माग गरेका थिए। उनले थपे, “यदि तपाईंहरूले राख्नुहुन्न भने अमेरिकाले उनीहरूलाई लिनेछ।”

करिब एक घण्टापछि ट्रम्पले अर्को पोस्ट गर्दै आफूले अस्ट्रेलियाका प्रधानमन्त्री एन्थोनी अल्बानीजसँग कुरा गरेको र “पाँच जनाको व्यवस्थापन भइसकेको तथा बाँकी प्रक्रियामा रहेको” जानकारी दिएका थिए।

ट्रम्पको पोस्टले टोलीका केही सदस्यलाई इरानमा रहेका आफ्ना परिवारको सुरक्षाको चिन्ता भएको र त्यसैले उनीहरूले स्वदेश “फिर्ता जानुपर्छ” भन्ने महसुस गरेको पनि संकेत गरेको थियो।

ट्रम्पले भनेका छन्, “जे होस्, प्रधानमन्त्रीले यो निकै संवेदनशील परिस्थितिलाई सम्हाल्न धेरै राम्रो काम गरिरहनुभएको छ। भगवानले अस्ट्रेलियाको रक्षा गरून्!”

तर अस्ट्रेलियामा रहेका इरानी फुटबलरहरूको विषयमा ट्रम्पको यो चासो उनको प्रशासनले इरानी शरणार्थीहरूलाई इरान नै फिर्ता पठाएको (डिपोर्ट गरेको) केही महिनापछि मात्रै आएको हो।

ट्रम्प प्रशासनले गत वर्षको अन्त्यमा शरणार्थीसम्बन्धी सबै निर्णयहरूलाई स्थगित गरेको थियो र इरानलगायत दर्जनौं देशका नागरिकहरूलाई आप्रवासी भिसा जारी गर्न बन्द गरेको छ। प्रशासनले प्रणालीमा भइरहेको “दुरुपयोग अन्त्य गर्न” यस्तो कदम चालेको बताएको छ।

गत वर्ष, शरणार्थी आवेदन अस्वीकृत भएका व्यक्तिहरूसहित इरानीहरूको दुई समूहलाई अमेरिकाबाट इरान नै फिर्ता पठाइएको थियो। समाचारहरूमा जनाइएअनुसार ती समूहहरूमा एलजीबीटी समुदायका सदस्यहरू पनि समावेश थिए, जसले इरानमा गम्भीर कानुनी र सामाजिक सजायको सामना गर्नुपर्ने अवस्था छ।