महाविपद्बारे छलफल गर्न संसद् बैठक आह्वान, सभामुखले विशेष प्रस्ताव पेस गर्ने
सहयात्रा टिभी
काठमाडौँ । भदौ १६, गत भदौ १० गते रसुवाको भोटेकोशी नदीमा आएको विनाशकारी बाढीले निम्त्याएको महाविपद्बारे छलफल गर्न प्रतिनिधिसभाको बैठक भोलिका लागि आह्वान गरिएको छ। प्रतिनिधिसभाको कार्यव्यवस्था परामर्श समितिको बैठकले उक्त निर्णय गरेको हो।
भदौ १० गते बसेपछि अनिश्चितकालका लागि स्थगित भएको संसद् बैठक भोलि बस्न लागेको हो। भोलिको बैठकमा सभामुख डोलप्रसाद अर्यालले बाढीको यस महाविपद्बारे विशेष प्रस्ताव पेस गर्ने कार्यसूची रहेको छ, जसमाथि संसद्मा रहेका सबै राजनीतिक दलका नेताहरूले आ-आफ्नो धारणा राख्नेछन्।
भदौ १० गते भोटेकोशी नदीमा बाढी र गेग्रानका कारण नदीको बहाव एक्कासि बढ्दा वरपरका बस्ती, सडक, पुल तथा जलविद्युत् आयोजनाहरूमा ठूलो क्षति पुगेको छ। यस विनाशकारी बाढीले स्थानीय पूर्वाधार मात्र नभई कैलाश हिमाल तथा मानसरोवर यात्रामा निस्किएका पर्यटकहरूलाई समेत गम्भीर रूपमा प्रभावित बनाएको छ।
९८७ जनाको शव फेला, ३ हजार ९१६ अझै बेपत्ता
राष्ट्रिय विपद् जोखिम न्यूनीकरण तथा व्यवस्थापन प्राधिकरणले मंगलबार बिहान ९ बजेसम्म संकलन गरेको तथ्यांकअनुसार यस बाढीमा परी ज्यान गुमाउने ९८७ जनाको शव फेला परिसकेको छ।
प्राधिकरणका अनुसार सबैभन्दा बढी क्षति चितवनमा भएको छ, जहाँ ३२१ जनाको शव फेला परेको छ। त्यसैगरी, नवलपरासी पूर्वमा २१६, नवलपरासी पश्चिममा १७०, नुवाकोटमा ९५, गोरखामा ६५, धादिङमा ५५, तनहुँमा ३८ र रसुवामा २७ जनाको शव भेटिएको छ।
बाढीमा परी अझै ३ हजार ९१६ जना सम्पर्कविहीन छन् भने २७९ जना घाइते भएका छन्। हालसम्म विभिन्न प्रभावित क्षेत्रबाट ११ हजार ८१४ जनाको सकुशल उद्धार गरिएको छ।
२० हजारभन्दा बढी सुरक्षाकर्मी उद्धारमा
बाढी प्रभावित क्षेत्रमा उद्धार, राहत तथा पुन:स्थापनका लागि ठूलो संख्यामा सुरक्षाकर्मी परिचालित छन्। प्राधिकरणका अनुसार हालसम्म २० हजार ८१९ सुरक्षाकर्मी फिल्डमा खटिएका छन्। जसमा नेपाली सेनाका ८ हजार ७२२, नेपाल प्रहरीका ७ हजार ८९४ र सशस्त्र प्रहरी बलका ४ हजार २०३ जना सुरक्षाकर्मी अहोरात्र उद्धार कार्यमा सक्रिय रहेका छन्।