‘छक्का पञ्जा ३’ ले कमायो दुई दिनमा दुई करोडमाथि
काठमाण्डौं । असोज–२६, यस वर्ष कमजोर देखिएको नेपाली फिल्म बजारलाई दशैंको छेको पारेर प्रदर्शनमा आएको ‘छक्का पन्जा ३’ ले चलायमान बनाएको छ । फिल्मका वितरक र निर्माताका अनुसार यस फिल्मले दुई दिनमा दुई करोडबढि आम्दानि गरेको छ ।
फिल्मले प्रदर्शनको पहिलो दिन १ करोड ३० लाख र दोस्रो दिन ८० लाख ग्रस कलेक्सन गरेको हो । देशभरका अधिकांश सिंगल स्कृनमा वर्चश्व र मल्टिप्लेक्समा सर्वाधिक सोज पाएका कारण फिल्मको इनिसियल बक्सअफिस बम्पर भएको हो ।
अब विस्तारै फिल्मको कलेक्सन मोफसलतर्फ बढ्न थालेको छ । राजधानी बाहिरका मेजर स्टेशन नारायणगढ, पोखरा, हेटौँडा, बुटवल, बिर्तामोड सबैतिर हरेक दिन फिल्मले हाउसफुल दर्शक पाएको वितरक कम्पनी एफडीले जानकारी दिएको छ । फिल्मलाई दीपाश्री निरौलाले निर्देशन गरेकी हुन् ।
पाँचदिने विकेन्ड पाएको फिल्ममा दीपकराज गिरी, दीपिका प्रसाईँ, केदार घिमिरे, जितु नेपाल, बुद्धि तामाङ, शिवहरि पौडेलको हास्यकलाकारको जम्बो टोलीसहित दीपिका प्रसाईँ, प्रियंका कार्की, स्वस्तिमा खड्का, बर्षा राउत, संजोग कोइरालालगायतको अभिनय रहेको छ ।