रुसी राष्ट्रपति पुटिनका विरोधी नाभाल्नी स्वदेश फर्किए लगत्तै विमानस्थलबाट पक्राउ
सहयात्रा टिभी
काठमाडौं । माघ ५, रुसका राष्ट्रपति भ्लादिमिर पुटिनका आलोचक एवं विपक्षी नेता एलेक्सी नाभाल्नीलाई हिरासतमा लिइएको छ।
स्नायु विषको प्रयोगका कारण झन्डै ज्यान गुमाएका रुसी विपक्षी नेता नाभाल्नीलाई पाँच महिनापछि जर्मनीबाट मस्को फर्किएको केही समयमै हिरासतमा लिइएको हो।
उनलाई पक्राउ गरेकोप्रति पश्चिमा नेताहरूले मस्कोको निन्दा गरेका छन्। क्रेमलीनका आलोचक ४४ वर्षीय नाभाल्नीलाई विमानस्थलको पासपोर्ट नियन्त्रण कक्षबाट प्रहरीले हिरासतमा लिएका थिए।
उनलाई अभिवादन गर्न मस्कोको नुकोभो विमानस्थलमा भीड जम्मा भएपछि उनको विमान अन्यत्रै ओरालिएको थियो। नाभाल्नीले उनलाई विष दिने कार्यका पछाडि रुसी अधिकारीहरू रहेको बताएका छन्। खोजपत्रकारहरूले उनको आरोप सही भएको बताएका छन् तर क्रेमलीनले त्यसलाई अस्वीकार गरेको छ।
अमेरिकाका राष्ट्रपतिमा निर्वाचित जो बाइडनको टोलीले नाभाल्नीलाई तुरुन्त रिहा गर्न माग गरेको छ।
बाइडनले राष्ट्रिय सुरक्षा सल्लाहकारमा मनोनित गरेका जेक सुलिभानले नाभाल्नीको ज्यान लिने कोसिस गरेकाहरूलाई जबाफदेही बनाउन पनि आह्वान गरे।
अन्य पश्चिमा नेताहरूले पनि नाभाल्नीको पक्राउको निन्दा गरेका छन्। युरोपेली परिषद्का अध्यक्ष चार्ल्स मिसेलले नभाल्नीको पक्राउलाई ‘अस्वीकार्य’ भनेका छन्।
“म सही छु भन्ने मलाई थाहा छैन। मलाई कुनै डर छैन,” मस्कोको शेरेमेत्येभो विमानस्थलमा पक्राउ पर्नु केही मिनेट अगाडि आफ्ना समर्थक तथा सञ्चारकर्मीलाई नाभाल्नीले यसो भनेका थिए।
उनका वकिललाई साथमा जान दिइएन। यसअघि आइतवार उनको विमान उत्रिने भनिएको नुकोभो विमानस्थलमा अतिरिक्त दङ्गा प्रहरी खटाइएको तथा सुरक्षा बन्दोबस्त गरिएको थियो।
कैयौ अन्य अभियानकर्मीहरू पक्राउ परेको रुसी सञ्चारमाध्यमले जनाएका थिए। गत वर्ष अगस्टमा स्नायु विष दिइएपश्चात् नाभाल्नीलाई जर्मनीमा उपचार गरिएको थियो।
त्यतिखेर साइबेरियामा आन्तरिक उडानकै क्रममा विमानभित्र नाभाल्नी बेहोस भएका थिए। उनलाई नोभिचोक नामक विष दिइएको पछि पत्ता लागेको थियो।
रुसी अधिकारीहरूले सो घटनामा आफू जिम्मेवार नभएको बताउँदै आएका छन् भने नाभाल्नीले चाहिँ राष्ट्रपति भ्लादिमिर पुटिनको आदेशमा आफूलाई विष दिइएको बताउँदै आएका छन्।
-बीबीसीबाट