इन्टरनेशनल लिग टी-२० : सन्दीपले डिजर्ट भाइपर्सबाट खेल्ने
सहयात्रा टिभी
काठमाडौं । भदौ ४, नेपाली राष्ट्रिय क्रिकेट टोलीका कप्तान सन्दीप लामिछानेले इन्टरनेशनल लिग टी-२० क्रिकेट प्रतियोगिता डिजर्ट भाइपर्सबाट खेल्ने भएका छन्।
लान्सर क्यापिटलको स्वामित्वमा रहेको डिजर्ट भाइर्पसले शुक्रबार लिगका लागि १४ विदेशी खेलाडीको नाम सार्वजनिक गरेको छ।
जसमा सन्दीपसहित टम कुरान, शेल्डन कट्रेल, साम बिलिङ्स, वानिन्दु हसरंगा, बेन डकेट, एलेक्स हाल्सलगायत खेलाडी छन्।
इमिरेट्स क्रिकेट बोर्डको आयोजनामा हुन लागेको पहिलो संस्करणको इन्टरनेशनल लिग टी-२० क्रिकेट प्रतियोगितामा सन्दीप यसअघि नै मार्की खेलाडीको रुपमा अनुबन्ध भएका थिए। त्यसबाट उनलाई भाइपर्सले लिएको हो।
यो प्रतियोगिता आगामी वर्ष जनवरी ६ देखि फेब्रुअरी १२ सम्म आयोजना हुनेछ। जसमा ६ फ्रेन्चाइज टोलीले डबल राउन्ड रोविनका आधारमा प्रतिस्पर्धा गर्नेछन्।
आयोजकका अनुसार हरेक टोलीमा १८ खेलाडी हुनेछन्। जसमध्ये १४ खेलाडी विदेशी रहने छन्। भाइपर्ससहित ६ वटै टोलीले आफ्नो १४ विदेशी खेलाडीको नाम सार्वजनिक गरिसकेका छन्। हरेक टोलीको बाँकी ४ खेलाडी भने यूएईकै हुने बताइएको छ।