दोलखामा स्मार्ट स्ट्रिट लाइट जडान गर्न सुरु
सहयात्रा टिभी
दोलखा । भदाै १९, एक करोडभन्दा बढीको लगानीमा दोलखाको भीमेश्वर नगरपालिकाको बजार क्षेत्रमा स्मार्ट स्ट्रिट लाइट जडान गर्न सुरु भएको छ।
नगरपालिकाको ६० प्रतिशत र नेपाल विद्युत् प्राधिकरणको ४० प्रतिशत लगानीमा सडक बत्ती जडान गर्न सुरु गरिएको नगरप्रमुख ईश्वरनारायण मानन्धरले जानकारी दिए । उनका अनुसार एक करोड ३९ लाख रुपियाँ लागतमध्ये ८० लाख रुपियाँमा जडान गर्ने ठेक्का सम्झौता भएअनुसार काम सुरु भएको हो । सामान आइसकेको छ ।
कोरोनाका कारण दुई वर्ष ढिला भए पनि जडान सुरु भएको छ । भएका पुराना पोललाई समेत प्रयोग गरी करिब एक सयवटा पोल गाडिनेछ । स्मार्ट सडक बिजुली बत्तीको विशेषता बजारमा भीडभाड हुँदा चहकिलो र भीड नहुँदा मधुरो बल्ने गर्दछ ।
भीडभाडमा यसले सुरक्षाको अनुभूति पनि दिने नगरप्रमुख मानन्धरले जानकारी दिए। बसपार्क, सातदोबाटो, चरीघ्याङ, पाटीखोला, सिमपानी, चरीकोट बजार र नगरपालिकाको कार्यालयसम्मका मुख्य चोकहरूमा सडक जडान हुने उनले जानकारी दिए।