लिभरपुलका चार खेलाडीलाई बिदा गर्न शनिवार विशेष कार्यक्रम
सहयात्रा टिभी
काठमाडौँ । जेठ ५, लिभरपुलका चार खेलाडीले यस सिजनको अन्त्यमा क्लब छाड्ने पक्का जस्तै भएको छ ।
सो क्लबका फरवार्ड रोबर्टो फिर्मिनोसहित मिडफिल्डर जेम्स मिलनर, एलेक्स च्याम्बरलेन र नेबी केइटाले सिजन समाप्त भएपछि लिभरपुल छाड्ने निश्चित भएको छ ।
लिभरपुल छाड्न लागेका चारै खेलाडीको सम्झौता यसै सिजनको अन्त्यमा सकिँदै छ । सो सम्झौता सकिए सँगै उनीहरूले बिदा हुन लागेका हुन् ।
२०१९ मा च्याम्पियन्स लिग र २०१९/२० को सिजन प्रिमियर लिगको उपाधि जितमा यिनीहरूको महत्त्वपूर्ण भूमिका रहेको लिभरपुल व्यवस्थापनले स्मरण गरेको छ । जसकाकारण पनि लिभरपुलले शनिबार घरेलु मैदानमा हुने एस्टन भिल्ला विरुद्धको खेलमा चार खेलाडीलाई विशेष सम्मानसहित अनौपचारिक रूपमा बिदाइ सन्देश दिनका लागि विशेष कार्यक्रमको आयोजना गरेको छ । सो सम्मान कार्यक्रम पछि यस सिजन लिभरपुलले घरेलु मैदानमा खेल्ने अन्तिम खेल हुनेछ ।
मिलनर र फिर्मिनो सँगै अर्थात् २०१५ मा लिभरपुलमा आबद्ध भएका थिए । सो अघि म्यानचेष्टर सिटीमा रहेका ३७ वर्षीय मिलनरले भने प्रिमियर लिगमा ६ सय १७ खेल खेलेको रेकर्ड रहेको छ । उनी लिभरपुलबाट सर्वाधिक खेल खेल्ने सूचीको तेस्रो स्थानमा रहेका छन्।
यसैगरी, २ सय ५४ खेल खेलेर बिदा हुन लागेका फिर्मिनोले भने लिभरपुलका लागि ८० गोल गरेका छन् । ३१ वर्षीय फिर्मिनोसँगै मोहमद सलाहा र साडियो मानेको लिभरपुलमा खुबै जमेका खेलाडीको रूपमा स्मरण गरिन्छ ।
केइटाले लिभरपुलका लागि सबैभन्दा कम अर्थात् जम्मा १ सय १९ खेल खेल्दै ११ गोल मात्रै गरेका छन् भने चेम्बर लेनले १ सय ४६ खेलबाट लिभरपुलका लागि १८ गोल मात्र गरेका छन् ।