कोरोना शंकास्पद बिरामीको मृत्यु

सहयात्रा टिभी

विराटनगर । श्रावण–२३,कोरोना भाइरसको आशंकामा विराटनगरको कोशी अस्पतालमा उपचारका लागि ल्याइएका एक मारवाडी समुदायका पुरुषको शुक्रबार मृत्यु भएको छ ।अस्पतालका मेडिकल सुपरिटेन्डेन डा. चुमनलाल दासले विराटनगर महानगरपालिका -९ का ५८ वर्षीय जयप्रकाश अग्रवालको बिहान ९:१५ बजे मृत्यु भएको बताए ।उनकाअनुसार मृतकमा कोरोनासँग मिल्दोजुल्दो लक्षण देखिएको छ । कोरोना शंकास्पद पुरुषको शव अहिले अस्पतालकै आइसोलेसनमा राखिएको छ । ‘अग्रवाललाई एक सातादेखि ज्वरो र खोकीको समस्या रहेछ,’डा.दासले भने, ‘परिवारका सदस्यले निमोनिया हो भन्दै बाहिरकै निजी स्वास्थ्य संस्थामा उपचार गराइरहेको पाइएको छ ।’स्वास्थ्य अवस्था झन् जटिल बन्दै गएपछि भने बिहान उपचारका लागि कोशी ल्याइएको जानकारी उनले दिए । उनले भने, ‘अस्पतालको बेडमा पुर्‍याउँदा बिरामीको मृत्यु भइसकेको थियो ।’

डा. दास भन्छन् ,मृतकमा लामो समयदेखि उच्च रक्तचापको पनि समस्या रहेको पाइएको छ । कोशी अस्पताल ल्याउनुअघि बिरामीको उपचार गर्ने निजी स्वास्थ्य संस्थाको पहिचान भइनसकेका कारण पत्ता लगाउने काम भइरहेको जानकारी उनले दिए ।मृतकमा कोरोनाको आशंका गरिएका कारण स्वाब संकलन गरेर पीसीआर परीक्षणका लागि पठाइएको उनको भनाइ छ । रिपोर्ट आइसकेपछि मृतकमा कोरोना भए÷नभएको पत्ता लाग्ने डा. दासले बताए । रिपोर्ट नेगेटिभ आएमा दाहसंस्कारका लागि परिवारका सदस्यको जिम्मा लगाइने र पोजेटिभ आएमा व्यवस्थापनका लागि नेपाली सेनालाई बुझाइने जानकारी डा. दासले दिए ।