कांग्रेस महाधिवेशन : नयाँ नेतृत्व चयनका लागि आज निर्वाचन हुँदै
सहयात्रा टिभी
काठमाडौँ । २७ मंसिर, नेपाली काँग्रेसको १४औँ केन्द्रीय महाधिवेशनमा नयाँ नेतृत्वका लागि आज मतदान हुँदैछ ।
गत शुक्रबारबाट सुरु भएको महाधिवेशनमा आइतबार उम्मेदवारको अन्तिम नामालवी प्रकाशित भइसकेपछि आज बिहान ८ बजेदेखि साँझ ५ बजेसम्म मतदानको कार्यतालिका निर्धारण गरिएको छ ।
सभापतिसहित १३४ पदका लागि ४९१ जना चुनावी मैदानमा छन् । कांग्रेसमा ४ हजार ७ सय ४३ जना महाधिवेशन प्रतिनिधिले मतदान गर्नेछन् । काठमाडौंको भृकुटीमण्डपमा दुई वटा र राष्ट्रियसभा गृहमा एउटा गरी जम्मा तीन ठाउँमा मतदानस्थल निर्माण भएको छ ।
प्रकाशित नामावलीअनुसार एक सभापतिका लागि पाँच जना, दुई जना उपसभापतिका लागि सात जना, दुई जना महामन्त्रीका लागि ६ र आठ जना सहमहामन्त्रीका लागि १९ जनाको उम्मेदवारी परेको छ ।
पहिलो चरणमा सबै पदको मतदान प्रक्रिया सम्पन्न भए पश्चात् सभापति पदको मतगणना हुनेछ । पहिलो चरणमा सभापतिमा ५० प्रतिशत मत नकटाए दोस्रो चरणमा निर्वाचन हुनेछ ।
सभापतिको प्रतिस्पर्धामा शेरबहादुर देउवा, विमलेन्द्र निधी, डा. शेखर कोइराला, प्रकाशमान सिंह र कल्याण गुरुङ छन् । सभापतिको निर्वाचनमा देउवा र कोइरालाबीच कडा प्रतिस्पर्धा हुने कांग्रेस नेता तथा कार्यकर्ताको भनाइ छ ।