रामबहादुर बम्जन पुर्पक्षका लागि दोस्रोपटक कारागार चलान

सहयात्रा टिभी

काठमाडौं । जेठ १३, विवादित धर्मगुरु रामबहादुर बम्जन, जो ‘लिटिल बुद्ध’को नामले पनि चिनिन्छन्, सम्पत्ति शुद्धीकरणको आरोपमा पुर्पक्षका लागि कारागार चलान भएका छन्। सर्लाही जिल्ला अदालतका न्यायाधीश जीवनकुमार भण्डारीको इजलासले सोमबार उनलाई थुनामा पठाउने आदेश दिएको हो।

अदालतका सूचना अधिकारी सिकिन्दर कापरका अनुसार, आदेशलगत्तै बम्जनलाई सोमबार राति नै सदरमुकामस्थित मलङ्गवा कारागार पठाइएको जिल्ला प्रहरी कार्यालयले जनाएको छ। बम्जनविरुद्ध गत फागुन ५ गते सम्पत्ति शुद्धीकरण कसुरमा सर्लाही जिल्ला अदालतमा मुद्दा दर्ता भएको थियो।

यो घटनाक्रम बम्जनलाई पहिलेको एक यौन दुराचार मुद्दामा सफाइ पाएको केही महिनापछि आएको हो। यसअघि, सर्लाही जिल्ला अदालतले नै २०८१ असार १० गते आफ्नै अनुयायी (आनी) माथि यौन दुर्व्यवहार गरेको अभियोगमा बम्जनलाई १० वर्ष कैद र पाँच लाख रुपियाँ क्षतिपूर्ति तिराउने फैसला सुनाएको थियो। तर, जनकपुर उच्च अदालतले गत चैत ६ गते उक्त फैसलालाई उल्ट्याउँदै बम्जनलाई कारागारमुक्त गरेको थियो।

सोमबार सम्पत्ति शुद्धीकरण मुद्दाको सुनुवाइका क्रममा बम्जन अदालतमा उपस्थित हुँदा दिनभर सदरमुकाम मलङ्गवामा उनका समर्थक तथा अनुयायीहरूको ठूलो भीड लागेको थियो।