विजयले तमिलनाडुको मुख्यमन्त्रीमा सपथ लिँदै गरे यी तिन घोषणा

सहयात्रा टिभी

काठमाडौँ । बैशाख २५ , जोसेफ विजय नेतृत्वको तमिलगा वेत्री कझगम (टिवीके) का अध्यक्ष विजयले आइतबार तमिलनाडुको मुख्यमन्त्री पदको शपथ लिएका छन्। यससँगै राज्यमा करिब छ दशकदेखि जारी दुई प्रमुख द्रविड दल डीएमके र एआईएडीएमके पालैपालो सत्तामा आउने क्रम अन्त्य भएको छ।

मुख्यमन्त्री बनेलगत्तै विजयले मञ्चमै तीन वटा आदेशमा हस्ताक्षर गरेका छन्। ती आदेशमा प्रत्येक घरलाई २०० युनिटसम्म निःशुल्क बिजुली उपलब्ध गराउने, लागुऔषध समस्यासँग जुध्न हरेक जिल्लामा विशेष बल गठन गर्ने तथा महिलाको सुरक्षाका लागि विशेष टास्क फोर्स बनाउने विषय समावेश छन्।

तमिलनाडुका राज्यपाल राजेन्द्र विश्वनाथ अर्लेकरले आइतबार विजयलाई पद तथा गोपनीयताको शपथ गराएका हुन्। शनिबार २३४ सदस्यीय विधानसभामा १२० निर्वाचित विधायकको समर्थन प्राप्त गरेपछि विजयलाई सरकार गठनका लागि आमन्त्रण गरिएको थियो। विजयले बिहान १० बजेपछि चेन्नईको नेहरू स्टेडियममा शपथ लिएका हुन्। उनीसँगै टिवीकेका केही वरिष्ठ नेतासहित अन्य नौ जनाले पनि मन्त्री पदको शपथ लिएका छन्।

विजयले कांग्रेसको सहयोगमा गठबन्धन सरकारको नेतृत्व गर्नेछन्। राज्यपालले विजयलाई मे १३ भित्र वा त्यसअघि नै विधानसभामा विश्वासको मत प्राप्त गर्न निर्देशन दिएका छन्। मन्त्री पदको शपथ लिने नौ जनामा ‘बुसी’ एन आनन्द, आधव अर्जुना, केजी अरुणराज, केए सेंगोट्टैयन, पी वेंकटरमणन, सीटीआर निर्मलकुमार, ए राजमोहन, टीके प्रभु र एस कीर्तना रहेका छन्।

विजय पेरम्बुर र तिरुची इस्ट दुवै निर्वाचन क्षेत्रबाट निर्वाचित भएका छन्। विजयसहित चेन्नईबाट कुल पाँच मन्त्री बनेका छन्। पश्चिमी क्षेत्रबाट दुई जना र दक्षिणी क्षेत्रबाट तीन जनालाई मन्त्रीमा प्रतिनिधित्व दिइएको छ। हाल मन्त्रिपरिषद्मा एक महिला तथा अनुसूचित जाति (एससी) समुदायबाट एक प्रतिनिधि समावेश छन्।

पछिल्ला केही दिनदेखि जारी राजनीतिक अनिश्चितता शनिबार साँझ अन्त्य भएको थियो, जब वीसीके र आईयूएमएलले पनि समर्थन जनाए। त्यसपछि टिवीकेको समर्थन संख्या १२० पुगेको थियो। त्यसपछि विजयले चेन्नईस्थित लोक भवनमा राज्यपालसँग भेट गरी कांग्रेस, सीपीआई, सीपीआई(एम), वीसीके र आईयूएमएलको समर्थन पत्र बुझाएका थिए। हालै सम्पन्न विधानसभा चुनावमा टिवीकेले १०८ सिट जितेको थियो। तर वास्तविक रूपमा यो संख्या १०७ मात्रै हो, किनकि पार्टी अध्यक्ष विजय दुई वटा सिटबाट निर्वाचित भएकाले उनले एउटा सिट छाड्नुपर्नेछ।