नारायणी नदीमा खतराको तह नाघ्यो, भरतपुरका तटीय बस्तीमा पस्यो बाढी

सहयात्रा टिभी

काठमाडौँ । असोज ११, चितवनमा रातभर परेको वर्षाका कारण देवघाटस्थित नारायणी नदीमा पानीको सतहले खतराको सीमा नाघेको छ। नदीमा बहाव निरन्तर बढ्दै गएपछि भरतपुर महानगरपालिकाका नदी तटीय बस्तीहरूमा बाढी पस्न थालेको छ।

भरतपुर महानगरपालिका–१७ र २८ का केही बस्तीहरूमा नदीको पानी पसेपछि स्थानीय बासिन्दालाई सुरक्षित स्थानतर्फ जान आग्रह गरिएको छ। नदीको सतह बढ्दै जाँदा समग्र पश्चिम चितवनका तल्लो क्षेत्रमा कटान र डुबानको उच्च जोखिम देखिएको छ।

चितवन प्रहरी प्रमुख एसपी रामेश्वर पौडेलका अनुसार जोखिम बढेका बस्तीहरूमा प्रहरी परिचालन गरी सतर्क रहन माइकिङ तथा सूचना प्रवाह भइरहेको छ।

नारायणीमा ७ दशमलव ३ मिटरलाई चेतावनीको तह मानिन्छ। अहिले नदीमा जलसतह चेतावनीको रेखा पार गरेर निरन्तर उकालो लागिरहेको छ।

यसैबीच, चितवनकै बनकट्टास्थित रिउ खोलामा पनि बाढीले खतराको तह पार गरेको छ। रिउ खोलामा ३ दशमलव ४० मिटरलाई चेतावनी र ३ दशमलव ८० मिटरलाई खतराको तह मानिनेमा अहिले जलसतह ४ दशमलव ६२ मिटर पुगेको छ। यो खोलामा पानीको सतह केही घट्न थाले पनि अझै खतराको रेखाभन्दा माथि नै बगिरहेको छ।

जल तथा मौसम विज्ञान विभागले नारायणी र रिउ खोला दुवैमा पानीको बहाव उच्च रहेकाले नदी किनारका सम्पूर्ण बासिन्दालाई विशेष सतर्कता अपनाउन र जोखिम देखिए तत्काल सुरक्षित स्थानतर्फ जान अपिल गरेको छ।