चीन र भारत पनि ईयूको प्रतिबन्धबाट दबाबमा

सहयात्रा टिभी

काठमाडौं । पुष ३, रुससँग निकट सम्बन्ध बनाएको भारत पश्चिमा देशको निशानामा पर्दै गएको छ । केही महिना अघि अमेरिकाको प्रतिबन्ध सामना गरेको भारत ईयूको समेत प्रतिबन्धबाट दबाबमा छ ।

रुसको अर्थव्यवस्था र युद्ध क्षमता कमजोर बनाउने उद्देश्यले युरोपेली संघले नयाँ प्रतिबन्धहरु लागू गरेको छ । १५ औं प्याकेजका यी प्रतिबन्धमा रुसको ‘श्याडो फ्लिट’ का साथै प्रविधि आपूर्तिमा नियन्त्रण तथा भारत, चीन, इरान जस्ता देशका कम्पनी समावेश छन् ।

श्याडो फ्लिट जहाजहरुको एक समूह हो जसले प्रतिबन्धित सामान तस्करीका लागि छद्म रणनीति उपयोग गर्दछ ।

युक्रेनसँग युद्ध सुरु भएयता ईयूले रुसको ‘श्याडो फ्लिट’का अरु धेरै जहाजलाई प्रतिबन्धको सूचीमा थपेको छ । यी जहाजले प्रतिबन्धलाई नजरअन्दाज गर्दै रुसी तेल, हतियार र युक्रेनबाट चोरिएका अन्न लैजाने गर्दछन् ।

युरोपेली आयोगका अनुसार यीमध्ये ३३ जहाजले रुसी तेल र पेट्रोलियम उत्पादन ढुवानी गरिरहेका थिए । अब कुल ४३ जहाज ईयूको प्रतिबन्धको दायरामा आएका छन् । यी जहाजले पश्चिमी देशले तय गरिदिएको मूल्यको सीमा तोडेर व्यापार गर्दै आएका थिए ।

ईयू प्रतिबन्धको १५ औं प्याकेज रुसका साथै रुसका सहयोगी देशलाई दबाब बढाउने उद्देश्यमा केन्द्रित छ । भारत र चीन जस्ता देशका कम्पनीलाई समेत प्रतिबन्ध लगाउनुले ईयू विश्वभर प्रतिबन्धको दायरा बढाउन उद्दत रहेको देखिन्छ । यसबाट भारत जस्ता देशहरुलाई दबाब पर्न सक्छ, जसले रुससँग व्यापारिक सम्बन्ध बनाएको छ ।