वीरगञ्जबाट पेट्रोलियम पदार्थको आयातमा वृद्धि, ४ महिनामा उठ्यो २२ अर्ब ९० करोड राजस्व
सहयात्रा टिभी
काठमाडौं । मंसिर १३ , चालू आर्थिक वर्षको पहिलो चार महिनामा वीरगञ्ज नाका हुँदै नेपाल भित्रिने पेट्रोलियम पदार्थको आयात र त्यसबाट प्राप्त हुने राजस्वमा वृद्धि देखिएको छ । वीरगञ्ज भन्सार कार्यालयको तथ्याङ्क अनुसार साउनदेखि कात्तिक मसान्तसम्मको अवधिमा ५४ अर्ब १२ करोड रुपैयाँ बराबरको पेट्रोलियम पदार्थ आयात भएको हो ।
यस अवधिमा डिजेल, पेट्रोल, खाना पकाउने ग्यास (एलपिजी), हवाई इन्धन र मट्टितेल लगायतका इन्धन आयात गर्दा राज्यको ढुकुटीमा २२ अर्ब ९० करोड रुपैयाँ राजस्व जम्मा भएको छ । गत आर्थिक वर्षको सोही अवधिको तुलनामा यस वर्ष इन्धन आयातको रकम २ अर्ब ९३ करोड रुपैयाँले बढी देखिएको छ । गत वर्षको यसै अवधिमा ५१ अर्ब १९ करोड मूल्य बराबरको पेट्रोलियम पदार्थ आयात हुँदा २० अर्ब ८९ करोड रुपैयाँ राजस्व सङ्कलन भएको थियो । वीरगञ्ज भन्सार कार्यालयका प्रमुख भन्सार प्रशासक विष्णुप्रसाद ज्ञवालीका अनुसार गत वर्षको तुलनामा यस वर्ष पेट्रोलियम पदार्थको आयातबाट प्राप्त हुने राजस्वमा ९ दशमलव ६० प्रतिशतले वृद्धि भएको छ ।
सबैभन्दा बढी खपत हुने डिजेल र पेट्रोलको आयात तथ्याङ्क हेर्दा दुवैमा उल्लेख्य वृद्धि भएको पाइन्छ । कात्तिक मसान्तसम्म २४ अर्ब ४० करोड मूल्य बराबरको दुई लाख ६८ हजार ६७६ किलोलिटर डिजेल आयात भएको छ, जसबाट १० अर्ब ७३ करोड राजस्व सङ्कलन भएको छ । गत वर्षको सोही अवधिमा २१ अर्ब ८३ करोडको डिजेल आयात हुँदा ९ अर्ब ७८ करोड मात्र राजस्व उठेको थियो ।
त्यस्तै, चालू आवको चार महिनामा १४ अर्ब २७ करोड मूल्य पर्ने एक लाख ६६ हजार ६६३ किलोलिटर पेट्रोल आयात भएको छ । यसबाट भन्सारले ९ अर्ब ४३ करोड राजस्व सङ्कलन गरेको छ । गत वर्षको सोही अवधिमा १२ अर्ब ४३ करोड मूल्यको पेट्रोल आयात हुँदा ८ अर्ब ११ करोड राजस्व प्राप्त भएको थियो ।
डिजेल र पेट्रोलको आयात बढे पनि खाना पकाउने ग्यास (एलपिजी) को आयात रकम र राजस्वमा भने गत वर्षको तुलनामा केही कमी देखिएको छ । चालू आवको समीक्षा अवधिमा ९ अर्ब ७७ करोड मूल्य बराबरको ९ करोड ७३ लाख ९६ हजार ४७२ किलोग्राम ग्यास आयात हुँदा १ अर्ब ८३ करोड राजस्व सङ्कलन भएको छ । जबकी, गत वर्षको सोही अवधिमा ११ अर्ब १० करोड मूल्य पर्ने १० करोड ३ लाख ५९ हजार किलोग्राम ग्यास आयात भई २ अर्ब ८ करोड राजस्व सङ्कलन भएको थियो ।