पहिरो पन्छाएपछि पृथ्वी राजमार्ग दुईतर्फी नै सञ्चालनमा

सहयात्रा टिभी

काठमाडौँ । असोज ८, पहिरो पन्छाएसँगै अवरुद्ध बनेको पृथ्वी राजमार्ग दुईतर्फी रूपमै सञ्चालनमा आएको छ। धादिङको बेनीघाट रोराङ गाउँपालिका अन्तर्गत कृष्णभिर र ज्यामिरेमा खसेको लेदोसहितको पहिरो हटाएपछि राजमार्ग पूर्ण रूपमा खुलेको हो।

धादिङ प्रहरीका अनुसार लगातारको वर्षाका कारण बेनीघाट रोराङ गाउँपालिका–७ स्थित कृष्णभिर नजिकै र वडा नम्बर ९ को ज्यामिरे खण्डमा पहिरो खसेको थियो। लेदो र ढुंगा-माटोसहितको पहिरोका कारण शुक्रबार बिहानदेखि राजमार्ग एकतर्फी मात्र सञ्चालनमा रहेको थियो। सडक विभाग र सुरक्षाकर्मीको टोलीले पहिरो पन्छाएपछि रोकिएका सवारीसाधनहरू दुवैतर्फ सुचारु भएका छन्।

यसअघि गत भदौ १० र १४ गते भोटेकोशी तथा त्रिशूली नदीमा आएको भीषण बाढीले कृष्णभिर खण्डको सडक कटान गर्दा पृथ्वी राजमार्ग लगातार १८ दिनसम्म ठप्प बनेको थियो। बाढीले बगाएको ठाउँमा नयाँ ट्र्याक निर्माण गरेर गत असोज १ गतेदेखि मात्रै राजमार्ग पुनः सञ्चालनमा ल्याइएको थियो।