वर्षा र विपद्को जोखिम बढेपछि विराटनगर र पोखराका विद्यालय दुई दिन बन्द

सहयात्रा टिभी

काठमाडौँ । असोज ८, देशभर भारी वर्षाको सम्भावनासँगै निम्तिन सक्ने प्राकृतिक विपद्को जोखिमलाई मध्यनजर गर्दै विराटनगर र पोखरा महानगरपालिकाले आ–आफ्ना क्षेत्रभित्रका विद्यालयहरूमा दुई दिन बिदा दिने निर्णय गरेका छन्। सम्भावित बाढी, पहिरो र डुबानबाट बालबालिकालाई सुरक्षित राख्न पूर्वसावधानीस्वरूप दुवै महानगरले असोज ८ र ९ गते (आज र भोलि) पठनपाठन बन्द गरेका हुन्।

विराटनगर महानगरपालिकाको शैक्षिक प्रशासन महाशाखाका अनुसार जल तथा मौसम विज्ञान विभागले असोज ८ देखि ११ गतेसम्म देशका विभिन्न भागमा भारीदेखि अति भारी वर्षाको प्रक्षेपण गरेकाले विद्यालय बन्द गर्ने निर्णय लिइएको हो। वर्षाका कारण नदीनालामा पानीको सतह बढ्ने, बस्ती र सडक डुबानमा पर्ने तथा आवागमन अवरुद्ध हुने जोखिम रहेकाले विद्यार्थी र सर्वसाधारणको सुरक्षालाई प्राथमिकता दिइएको महानगरले स्पष्ट पारेको छ। यसका साथै बाढी वा डुबानको विपद् आइपरेमा सुरक्षित विद्यालय भवनहरूलाई अस्थायी आश्रयस्थलका रूपमा प्रयोग गर्न सकिने गरी तयारी अवस्थामा राख्न पनि विराटनगर महानगरले विद्यालय प्रशासनहरूलाई आग्रह गरेको छ।

उता पोखरा महानगरपालिकाले पनि मौसममा आएको अचानक फेरबदल र सम्भावित विपद्लाई ध्यानमा राख्दै नगर क्षेत्रभित्रका सम्पूर्ण सामुदायिक तथा संस्थागत विद्यालयहरूमा दुई दिन स्थानीय बिदा दिएको छ। पोखराका मेयर धनराज आचार्यले बाढी, पहिरो र अतिवृष्टिको उच्च जोखिम रहेकाले विद्यालय बन्द गरिएको जानकारी दिएका छन्। उनका अनुसार अहिले दिइएको यो दुई दिनको बिदालाई पछि आउने अन्य सार्वजनिक बिदासँग समायोजन गरिनेछ। मेयर आचार्यले नगरवासी, शिक्षक, अभिभावक र विद्यार्थीहरूलाई उच्च सतर्कता अपनाउँदै सुरक्षित स्थानमा रहन अपिलसमेत गरेका छन्।

मौसम पूर्वानुमान महाशाखाले विशेषगरी गण्डकी र लुम्बिनी प्रदेशलगायत देशभरका विभिन्न भू-भागमा भारी वर्षाको सम्भावना औंल्याएको छ। नदी तटीय क्षेत्र र भिरालो जमिन आसपासका बासिन्दालाई विशेष सावधानी अपनाउन अनुरोध गरिएको छ।