डा. केसीलाई सामान्य सोधपुछ मात्र गरेका हौं : अध्यक्ष नारसिंह रोकाय

सहयात्रा टिभी

डोल्पा। श्रावण –२३, डोल्पाको जगदुल्ला गाउँपालिका अध्यक्ष नारसिंह रोकायले स्वास्थ्य शिविर सञ्चालनका लागि डोल्पाको जगदुल्ला पुगेका डा. गोविन्द केसीलाई आफूहरूले अवरोध नगरेको बताएका छन् ।

१३ साउनमा जगदुल्ला–६ रिमी स्वास्थ्य चौकी पुगेका डा. केसीलाई सामान्य सोधपुछ गरे पनि शिविर सञ्चालनमा अवरोध नपुर्‍याइएको उनले बताए ।‘उहाँ आएको जानकारी पाएपछि वडाध्यक्ष भक्तबहादुर बुढाथोकीलाई कुन संस्था, कहाँबाट आउनु भएको हो भनेर सोधपुछ गर्न लगाएको भने सत्य हो,’ रोकायले भने, ‘हामी पनि आवश्यक सहयोग गरौँला भनिएको हो । शिविर सञ्चालन गर्न नदिने र आधिकारिक अनुमति लिन भनिएको होइन ।’उनी भन्छन् ।वडाध्यक्षसँग डा. केसीले आफू कुनै राजनीतिक कार्यक्रम गर्न नभई स्वतन्त्र नागरिकका हैसियतमा स्वतःस्फूर्त सेवा गर्न आएको बताएको रोकायले जानकारी दिए ।१३ साउनमा स्वास्थ्य चौकी पुगेका डा. केसी भोलिपल्ट ८० जना बिरामी जाँचेर आफूलाई असहज भएको बताउँदै १५ साउनमा जुम्ला फर्किएका थिए । जुम्ला पुगेर उनले जगदुल्लाका जनप्रतिनिधिको व्यवहारप्रति डा. केसीले विरोध जनाएका थिए ।