Category: समाज दर्पण

काठमाण्डौं । पुष–११, कालिकोट अग्निपिडितहरुका लागी रत्न रात्यलक्ष्मी क्याम्पसमा स्वतन्त्र विद्यार्थी युनियन र पिडित कालिकोटबासि आरआरका विद्यार्थीहरुको संयुक्त पहलमा चन्दा संकलन गरिएको छ । कालिकोट जिल्लाको पलाँता गाउँपालिका–१ खाडामा आइतबार भएको आगलागीमा पिडित परिवारको सहयोगका निम्ति बुधबार विहान आरआर क्याम्पसका विहनी शत्रका विद्यार्थी, कर्मचारी र प्रध्यापकहरुबाट चन्दा संकलन गरिएको हो ।

चन्दा संकलन कार्यक्रम मार्फत क्याम्पसबाट ४० हजार ८ सय ९० रुपयाँ संकलन भएको पिडित तथा आरआरका विद्यार्थी प्रामेद न्यौपानेले जानकारी गराए । चन्दा संकलन कार्यक्रम भोली पनि आरआर क्याम्पस, नेपाल ल क्याम्पस लगायतमा जारी रहने आरआर स्ववियुद्धारा जानकारी पाइएको छ ।

आइतबार राति लागेको आगोले ८७ वटा घर पुरै जलेर नष्ट बनाएपछि हाल खाडागाउँका बासिन्दा शोकमा डुबेका छन् । कुनै मानविय क्षति नभए पनि ठूलो मात्रामा धनराशि , खाद्यन्न, पशुचौपाय, लत्ताकपडालगायतको क्षति पुरै गाउँले बेहोर्नु परेको छ । आगलागीमा झण्डै ३ करोड बढीको क्षति भएको अनुमान गरिएको छ ।

आगलागीबाट ठूलो शोकमा डुबेको खाडा गाउँ हाल सर्वत्र चासोको विषय बनिरहेको छ भने राहतका निम्ति चन्दा संकलन कार्य पनि भइरहेको पाइएको छ ।

यसै विषयमा राष्ट्रपतिको कार्यायलबाट समेत विज्ञप्ति जारी भएको छ भने राष्ट्रपति विद्यादेवी भण्डारीले समेत घटनाप्रति टुवीटरमा टुवीट् गर्दै दुख व्यक्त गरेकी छन् ।

काठमाण्डौं । पुष–११, नेपाल कम्युनिष्ट पार्टी (नेकपा) स्थायी कमिटीको बैठकमा प्रस्तुत गरिएको राजनीतिक प्रतिवेदनमा विभिन्न सदस्यले राखेका विचार तथा जिज्ञासाको अध्यक्ष पुष्पकमल दाहाल‘प्रचण्ड’ ले आज जवाफ दिएका छन् ।

गत मङ्सिर २९ गतेदेखि शुरु भएको उक्त बैठक अध्यक्षद्वयले प्रस्तुत गरेको राजनीतिक प्रतिवेदनमाथिको छलफल सकिएपछि अध्यक्ष दाहालले उक्त बैठकमा भएको बहसले आपसमा एकताबद्ध भई राष्ट्रिय अभिभारा पूरा गर्न सहयोग पुग्ने विश्वास व्यक्त गरेको नेता बेदुराम भुसालले जानकारी दिए ।

अध्यक्ष दाहालले सङ्गठन सुदृढिकरणका लागि एउटा कार्यदल गठन गरी अघि बढ्न सकिने विचार व्यक्त गरे । प्रतिवेदनमा सरकारका उपलब्धि, पार्टीका काम, सचिवालयबाट अहिलेसम्म भए गरेका कार्य तथा निर्णयका साथै जिल्ला तथा जनसङ्गठनको एकतालगायत विषय समावेश गरिएका छन् । पार्टीका अर्का अध्यक्ष एवं प्रधानमन्त्री केपी शर्मा ओलीले भोलि प्रतिउत्तर दिने कार्यक्रम तय भएको छ । ती राजनीतिक प्रतिवेदन आवश्यकताअनुसार परिमार्जन गरी सर्वसम्मत पारित गरिने छ ।

बैठकले जनकनन्दनी गाउँपालिका–४ धनुषा निवासी पार्टीका नेता योगेन्द्र शाहप्रति श्रद्धाञ्जलि व्यक्त गरेको छ । गएराति दिवङ्गत भएका उनका शोकसन्तप्त परिवारजनमा समवेदना व्यक्त गरेको छ । बैठक यही पुस १२ गते अपरान्ह ३ बजेदेखि पार्र्टी केन्द्रीय कार्यालय धुम्बाराहीमा बस्ने गरी आज स्थगित भएको छ । रासस

तेह्रथुम । तेह्रथुममा लैङ्गिक हिंसा नियन्त्रण र सचेतीकरणका लागि जिल्लास्तरीय लैङ्गिक हिंसा नियन्त्रण सञ्जाल गठन भएको छ । जिल्ला प्रहरी प्रमुखको संयोजकत्वमा महिला हिंसा नियन्त्रण सञ्जाल बनाइएको हो ।

सन्जालले जिल्लामा लैङ्गिक हिंसाबाट पीडित महिलाहरुलाई न्याय प्राप्तिको निमित्त सुरक्षाको अनुभूति, सल्लाह र मनोवैज्ञानिक हौसला प्रदान गरी आत्मविश्वास जगाउन पहल गर्ने बताइएको छ ।

सञ्जालमा जिल्ला प्रहरी कार्यालयको महिला तथा बालबालिका सेवा केन्द्र सदस्य सचिव र सदस्यहरुमा विभिन्न संघसंस्था, नागरिक समाज, कानुन, उद्योग, बालकल्याण, सन्चार, शिक्षा र मानव अधिकार क्षेत्रका प्रतिनिधिहरु छन् ।

समुदाय प्रहरी साझेदारी कार्यक्रम अन्तर्गत यस्ता सञ्जालहरु सबै स्थानीय तह र वडास्तरसम्म पनि गठन गर्ने तयारी रहेको प्रहरी निरीक्षक देवीप्रसाद पौडेलले बताए । रासस

म्याग्दी। पुष–११, प्राकृतिक उपचारस्थलको रूपमा परिचित बेनी नगरपालिका–४ स्थित तातोपानी कुण्ड सञ्चालनका लागि निजी क्षेत्रलाई भाडामा दिन प्रस्ताव आएको छ।

म्याग्दी प्रवासी नेपाली सङ्घ ९मोना०ले बेनी नगरपालिका र सिङ्गा तातोपानी कुण्ड व्यवस्थापन समितिलाई कुण्ड सञ्चालनका लागि निजी क्षेत्रलाई भाडामा दिन प्रस्ताव गरेको हो। नगरपालिकाको कार्यालयमा मङ्गलबार आयोजित छलफलमा मोनाका अध्यक्ष चक्र थापा र पूर्वअध्यक्ष योगेन्द्र क्षेत्रीले कुण्ड निजी क्षेत्रलाई भाडामा दिन प्रस्ताव गरेका थिए।

उनीहरूले स्थानीयवासी र प्रवासी म्याग्देलीको लगानीमा अहिलेको भन्दा फरक हिसाबले व्यवस्थित रूपमा कुण्ड सञ्चालन गरेर पर्यटन प्रवद्र्धन गर्न सकिने भएकाले निजी क्षेत्रलाई भाडामा लिन प्रस्ताव गरेका हुन्।

नगर प्रमुख हरिकुमार श्रेष्ठको अध्यक्षतामा भएको छलफलमा कुण्ड व्यवस्थापन समितिका अध्यक्ष वीरेन्द्रमान शाक्य र सचिव कृष्ण खड्कालगायतले समुदायसँग छलफल गरेर मात्र निर्णय गर्न सकिने बताए।

लगानी, व्यवस्थापन र सञ्चालनको मोडल स्पष्ट हुनुपर्ने र स्थानीयवासीको भावना बुझ्न थप छलफल गर्ने निर्णय भएको बैठकमा सहभागी कुण्ड व्यवस्थापन समितिका सहसचिव कुमार केसीले बताए।

प्रवासीले केही वर्षयता विभिन्न माध्यमबाट कुण्ड भाडामा दिनका लागि प्रस्ताव र पहल गर्दै आएका छन्। छलफलमा बेनपाका वडाध्यक्ष र कार्यपालिका सदस्य, मोनाका पदाधिकारी र तातोपानीका अगुवाको सहभागिता रहेको थियो।

समुदायद्वारा सञ्चालित र विकास गरिएको कुण्डको आम्दानीले स्थानीय सरस्वती माध्यमिक विद्यालयमा निजी स्रोतका ११ शिक्षकको तलबभत्ताको व्यवस्थापन गरिँदै आएको छ। कुण्डको प्रवेश शुल्क र चन्दा सहयोगबाट पूर्वाधार निर्माण, कर्मचारीको तलब, व्यवस्थापन, नदी नियन्त्रणका साथै सामुदायिक गतिविधि र विकास निर्माणका काम गरिएको छ।

म्याग्दी नदीको किनारमा जमीनभित्रबाट वीरेनुनको गन्धसहित निस्कने ५० डिग्री सेल्सियस तातोपानी सङ्कलन गरिएको तलाउमा स्नान गरेमा ग्यास्ट्रिक, बाथरोग, ढाड दुख्ने, छाला, सुन्निएको, मर्किएको, पेट दुख्ने, खाना रुचि नहुनेलगायतका स्वास्थ्य समस्या निको हुने जनविश्वास छ।

कुण्डमा वार्षिक १६ हजार भन्दा बढी बिरामी आउने गरेका छन्। कुण्ड व्यवस्थापन समितिलाई रु ३०० प्रवेश शुल्क तिरेर दैनिक दुई पटकका दरले दश दिनसम्म तलाउमा स्नान गर्न सकिन्छ। रासस

एजेन्सी । पुष–११, विश्वको सबैभन्दा महङगो कफि ब्ल्याक आइभोरी ब्लेन्ड निकै घिनलाग्दो तरिकाबाट बन्ने गर्छ । उत्तरी थाइल्यान्डमा बन्ने उक्त कफि हात्तिको दिसामा मिसिएका बिउहरुबाट बनाइने गरिन्छ ।

यो कफि बनाउनको लागी पहिले हात्तिलाई काँचो कफि खुवाइन्छ । एक केजी कफि निर्माण गर्नका लागी करिब ३३ किलो काँचो कफि हात्तिलाई खुवाउनु पर्ने हुन्छ । हात्तिले उक्त कफि पचाएपनि दिसा बन्छ । हात्तिले गरेको दिसाबाट कफिको बिउ निकाल्ने काम प्रशिक्षण प्राप्त व्यत्तिबाट गरिन्छ । विउ छानेपछि त्यसलाई घाममा सुकाइ पिसेर धुलो कफि बनाउने गरिन्छ ।

यो कफि कडा नभएर नरम हुनुको साथै हात्तिले खाने फलफुलको बासना समेत कफिमा प्राप्त गर्न सक्छि । यति मेहनेत गरेर तयार गरिएको कफिको मुल्य प्रतिकिलो करिब एक लाख पर्ने गर्छ ।

काठमाण्डौं । पुष–११, जिल्ला प्रशासन कार्यालय बैतडीबाट हालसम्म एक जनाले मात्रै सिसीटिभी जडानको अनुमति लिएका छन्।

गोठलापानी बजारस्थित उदीप ट्रेडर्स एण्ड सप्लायर्सले मात्रै सिसीटिभी जडानको लागि अनुमति लिएको जिल्ला प्रशासन कार्यालय बैतडीका कम्प्युटर अपरेटर सुरेन्द्र भट्टले जानकारी दिए।
कार्यालयले यसअघि गएको मङ्सिरमा अनुमति नलिएर सिसीटिभी जडान गरेकालाई ३५ दिनभित्र अनुमति लिन समयसीमा दिएको थियो।

अपराध अनुसन्धान र नियन्त्रण गर्न विद्युतीय उपकरणलाई प्रभावकारी बनाउने प्रयोजनका लागि सिसीटिभी क्यामेरा प्रयोगलाई प्रोत्साहन गर्न उद्देश्यले जडान तथा सञ्चालनसम्बन्धी कार्यविधि, २०७२ स्वीकृत लिई मात्रै जडान गर्नुपर्ने भएकाले अनुमति लिन आग्रह गरिएको थियो।
प्रशासनले दिएको उक्त ३५ दिने समयसीमा समाप्त भइसक्दासमेत यहाँका सिसीटिभी प्रयोगकर्ताले अटेरी गरेका छन्। तर समयसीमाभित्रै विभिन्न सिसीटिभीका पाँच प्रयोगकर्ताले अनुमतिका लागि निवेदन दिएको छ।

दोगडाकेदार गाउँपालिका, राष्ट्रिय वाणिज्य बैंक, स्मार्ट अपसेट प्रेस, मेघा बैंक र एनसिसी बैंकले सिसीटिभी जडानको अनुमतिका लागि जिल्ला प्रशासन कार्यालयमा निवेदन दिएका छन्।
बैतडी जिल्लाभरि सिसीटिभी प्रयोगकर्ता कति छन् भन्ने यकिन तथ्याङ्क नभए पनि १०० को हाराहारीमा हुनसक्ने अनुमान गरिएको छ। कार्यविधि विपरित सिसीटिभी जडान एवं सञ्चालन भए गरेको पाइएमा विद्युतीय कारोवार ऐन, २०६३ बमोजिम कारवाही हुने प्रमुख जिल्ला अधिकारी चन्द्रप्रसाद गैरेले बताए।

सिसीटिभी जडान एवं सञ्चालनका लागि अनुमति लिए नलिएको बारे अनुगमन गरिने र अनुगमनका क्रममा नलिएको भए कारवाही प्रक्रिया अगाडि बढाइने उनले बताए। कार्यविधिअनुसार सिसीटिभी जडान गर्न अनिवार्य अनुमति लिनुपर्ने तथा खिचिएका श्रव्य दृश्य तथा अन्य विद्युतीय चित्र कम्तीमा पनि तीन महीनासम्म सुरक्षित राख्नुपर्ने व्यवस्था रहेको छ। रासस