नुवाकोट । बैशाख–१६, उर्जा, जलस्रोत तथा सिंचाइमन्त्री वर्षमान पुनले रसुवा र नुवाकोटका चार जलविद्युत आयोजनाको निरीक्षण गरेका छन् । शुक्रबार र शनिबार मन्त्री पुन आयोजना स्थलमै पुगी निरीक्षण गरेका हुन् ।
नुवाकोटको बिदुर नगरपालिका वडा नम्बर ६ मा नेपालकै सबैभन्दा ठूलो २५ मेगावाटको ग्रीड सोलार प्लान्टको शिल्यान्यास गरेका पुनले आयोजनामा भइरहेको प्रगतिबारे जानकारी लिँदै निर्धारित समयमा आयोजनाको काम सक्न निर्देशन समेत दिएका छन् ।
मन्त्री पुनद्धारा देवीघाट जलविद्युत आयोजना,त्रिशुली थ्री ए, त्रिशुली थ्री बी, चीलीमे जलविद्युत आयोजना, रसुवागढी जलविद्युत आयोजना र साञ्जेन जलविद्युत आयोजना गरी रसुवा र नुवाकोटका ६ वटा जलविद्युत आयोजनाको निरीक्षण गरिएको हो ।
मन्त्री पुनले आगामी १० वर्षमा कम्तिमा १० हजार मेघावाट जलविद्युत उत्पादन गर्ने सरकारको लक्ष्य रहेकाले उक्त लक्ष्य पुरा गर्न हाल निर्माण भइरहेका जलविद्युत आयोजनाका कार्यहरु समयमा नै सम्पन्न गर्नु पर्ने कुरामा जोड दिएका छन् ।
नुवाकोट र रसुवामा संचालित जलविद्युत आयोजनाहरुको अवलोकन तथा निरिक्षणका लागि मन्त्री पुनसँगै मन्त्रालयका सचिव अनुपकुमार उपाध्याय, नेपाल विद्युत प्राधिकरणका कार्यकारी निर्देशक कुलमान घिसिङ लगायत विभिन्न आयोजनाहरुका पदाधिकारी तथा निर्माण कम्पनीका प्रतिनिधीहरु पुगेका थिए ।
Leave a Reply