काठमाडौँ । असोज ८, मनसुनी प्रणालीसँगै पश्चिमी वायु र बंगालको खाडीमा विकसित न्यून चापीय क्षेत्रको संयुक्त प्रभावका कारण आउँदो शनिबारसम्म देशका अधिकांश भू-भागमा मौसम प्रतिकूल बन्ने देखिएको छ। मौसम पूर्वानुमान महाशाखाका अनुसार आगामी तीन दिन देशका विभिन्न भेगमा भारीदेखि अति भारी वर्षा र तराईका जिल्लाहरूमा हावाहुरी चल्ने सम्भावना छ।
बंगालको खाडीमा बनेको गहिरो न्यून चापीय क्षेत्र भारतको विशाखापट्टनम र गोपालपुरको बीचबाट उत्तर आन्ध्र प्रदेश तथा दक्षिण ओडिशाको तटीय क्षेत्र पार गरिसकेको छ। सुरुवाती अवस्थामा यसले आफ्नो तीव्रता कायम राख्दै उत्तर-पश्चिमतर्फ अघि बढ्ने र आगामी २४ घण्टाभित्र उत्तर-उत्तरपश्चिम सर्दै क्रमशः कमजोर बन्दै जाने महाशाखाले जनाएको छ। हाल यसैको प्रभावका कारण कोसी, मधेस र वाग्मतीका धेरैजसो ठाउँ, गण्डकी र लुम्बिनीका केही भू-भाग तथा कर्णाली र सुदूरपश्चिमका एक-दुई स्थानमा हल्का वर्षा भइरहेको छ।
महाशाखाले जारी गरेको पछिल्लो मौसमी बुलेटिन अनुसार बिहीबार दिउँसो कोसी, वाग्मती, गण्डकी र लुम्बिनीका थोरै स्थानमा भारीदेखि धेरै भारी वर्षा हुने देखिन्छ। आजै दिउँसो मधेस र कोसीका तराई क्षेत्रमा हावाहुरी चल्ने सम्भावना छ। यस्तै, बिहीबार राति यी चार प्रदेशका साथै मधेस प्रदेशका समेत एक-दुई ठाउँमा धेरै भारी वर्षा हुनसक्नेछ भने मधेस, कोसी, वाग्मती, गण्डकी र लुम्बिनीका तराई भू-भागमा तीव्र हावाहुरी चल्ने आकलन गरिएको छ।
शुक्रबारदेखि भने वर्षाको तीव्रता अझ बढ्ने महाशाखाको प्रक्षेपण छ। शुक्रबार दिउँसो कोसी, मधेस, वाग्मती, गण्डकी, लुम्बिनी र कर्णालीका थोरै स्थानमा भारीदेखि धेरै भारी वर्षाको सम्भावना छ। विशेषगरी गण्डकी र लुम्बिनीका एक-दुई स्थानमा भने ‘अति भारी’ वर्षाको चेतावनी दिइएको छ। यो क्रम शुक्रबार राति पनि जारी रहनेछ। रातिको समयमा देशभरका थोरै स्थानमा भारीदेखि धेरै भारी वर्षा हुँदा गण्डकी र लुम्बिनीमा पुनः अति भारी वर्षा दोहोरिन सक्नेछ। शुक्रबार दिन र रात दुवै समय मधेस, वाग्मती, गण्डकी, लुम्बिनी र कोसीका तराई भेगमा हावाहुरीको प्रभाव देखिनेछ।
शनिबार भने मनसुनी वर्षाको मुख्य प्रभाव मुलुकको पश्चिमी क्षेत्रतर्फ सर्ने महाशाखाले जनाएको छ। शनिबार दिउँसो गण्डकी, लुम्बिनी, कर्णाली र सुदूरपश्चिममा भारीदेखि धेरै भारी वर्षाको सम्भावना रहँदा लुम्बिनी र गण्डकीका केही ठाउँमा अति भारी वर्षा हुनसक्नेछ।
यस्तै शनिबार राति वाग्मती, गण्डकी, लुम्बिनी, कर्णाली र सुदूरपश्चिमका थोरै ठाउँमा भारीदेखि धेरै भारी वर्षा हुनेछ भने लुम्बिनी र सुदूरपश्चिमका एक-दुई स्थानमा अति भारी वर्षाको जोखिम छ। शनिबार पनि तराईका मधेस, कोसी, वाग्मती, गण्डकी र लुम्बिनी प्रदेशका भू-भागमा हावाहुरी चल्ने पूर्वानुमान महाशाखाको छ।
