प्रधानमन्त्री ओलीले आज शपथ लिँदै
सहयात्रा टिभी
काठमाडौँ । वैशाख ३१, तेस्रो कार्यकालका लागि प्रधानमन्त्रीमा नियुक्त केपी शर्मा ओलीले आज पद तथा गोपनियताको शपथ ग्रहण गर्दै छन् ।
ओलीले दिउँसो २ बजे शितल निवासमा शपथ ग्रहण गर्ने कार्यक्रम तय भएको राष्ट्रपति कार्यालय स्रोतले बतायो । शपथपछि उनले आजै पदभार ग्रहण गर्ने कार्यक्रम छ ।
विश्वासको मत पाउन नसकेपछि यही वैशाख २७ गते ओली प्रधानमन्त्रीबाट पदमुक्त भएका थिए ।
बहुमतको सरकार गठनको लागि राष्ट्रपति विद्यादेवी भण्डारीले दिएको ७२ घण्टाको अवधिमा अन्य दलले बहुमत पुर्याउन नसकेपछि ओली तेस्रो पटक प्रधानमन्त्रीमा नियुक्त भएका हुन् ।
अन्य दलले बहुमत पुर्याउन नसकेपछि राष्ट्रपति भण्डारीले संसदमा सबैभन्दा ठूलो दलको हैसियतले बिहीबार पुनः ओलीलाई नै प्रधानमन्त्री नियुक्त गरेकी हुन् ।
अल्पमतको सरकारको प्रधानमन्त्रीमा नियुक्त हुनु भएका ओलीले अब ३० दिनभित्र विश्वासको मत लिनु पर्ने छ ।