रामहरि खतिवडाको नाम संसदीय सुनुवाइ समिति सदस्यमा अनुमोदन
सहयात्रा टिभी
काठमाडौं । भदौ १३, प्रतिनिधिसभाले संसदीय सुनुवाइ समिति सदस्यमा नेपाली कांग्रेसका सांसद रामहरि खतिवडाको नाम अनुमोदन गरेको छ ।
शुक्रबार बसेको बैठकमा सभामुखको आसनबाट उपसभामुख इन्दिरा रानाले सुनुवाइ समितिको सदस्यमा कांग्रेसकी सांसद ईश्वरीदेवी न्यौपानेको ठाउँमा खतिवडाको नाम हेरफेर गर्ने प्रस्ताव गरेका थिए । जसलाई सभाले स्वीकृत गरेको हो ।
प्रतिनिधिसभाले उक्त प्रस्ताव स्वीकृत गरेसँगै सुनुवाइ समिति सदस्यमा कांग्रेसका सांसद खतिवडाको नाम अनुमोदन भएको हो ।
यसअघि खतिवडा प्रतिनिधिसभा अन्तर्गतको राज्य व्यवस्था तथा सुशासन समिति सभापति थिए । खतिवडाले राज्य व्यवस्था समिति सभापतिबाट राजीनामा दिएपछि रिक्त पदमा ईश्वरीदेवी न्यौपाने निर्वाचित भइसकेकी छन् ।
ईश्वरी न्यौपाने सुनुवाइ समिति सभापति थिइन् । सुनुवाइ समिति सभापतिबाट राजीनामा दिएर न्यौपाने राज्य व्यवस्था समितिको सभापति भएकी छन् । यो सँगै न्यौपानेलाई सुनुवाइ समिति सदस्यबाट समेत हेरफेर गरेर खतिवडालाई लगिएको छ ।