काङ्ग्रेस केन्द्रीय कार्यसमितिको बैठक आइतबार
सहयात्रा टिभी
काठमाण्डौं । मंसिर–८, प्रमुख प्रतिपक्षी दल नेपाली कांग्रेसको केन्द्रीय कार्यसमितिको बैठक आगामी मङ्सिर ९ गते आइतबार बस्ने भएको छ । पार्टी केन्द्रीय कार्यालयका मुख्यसचिव कृष्णप्रसाद पौडेलले आगामी महासमितिको बैठक तयारीबारे छलफल हुने बताए ।
“महासमितिको बैठकमा छलफलका लागि लैजाने विधानका सम्बन्धमा विधान मस्यौदा समितिले तयार पारेको मस्यौदाबारे केन्द्रीय समितिमा छलफल हुनेछ”, उनले भने। महासमिति बैठक मङ्सिर २८ देखि पुस ३ गतेसम्म काठमाण्डौँमा हुँदैछ ।
यसअघि उक्त बैठक मङ्सिर ५ देखि ९ गतेसम्म काठमाण्डौँमा बोलाइए पनि आवश्यक तयारी नपुगेका कारण सारिएको थियो । बैठक आइतबार बिहान ८ः३० बजे पार्टी केन्द्रीय कार्यालय सानेपामा बोलाइएको छ ।
बैठकमा काङ्ग्रेसले केन्द्रीय कार्यसमितिका पदाधिकारी, सदस्य र आमन्त्रित सदस्यलाई उपस्थितिका लागि अनुरोधसमेत गरेको छ । रासस