प्रधानमन्त्री देउवाले अमेरिका भ्रमणबारे संसदीय समितिमा जवाफ दिने
सहयात्रा टिभी
काठमाडौँ । असार ५, प्रधानमन्त्री शेरबहादुर देउवा आफ्नो आसन्न अमेरिका भ्रमणबारे जवाफ दिन आज संसदीय समिति जाँदैछन् ।
प्रतिनिधिसभा अन्तरगतको अन्तर्राष्ट्रिय सम्बन्ध समितिले जवाफका लागि डाकेपछि प्रधानमन्त्री देउवा समितिमा उपस्थित हुन लागेका हुन् । प्रधानमन्त्री देउवा उक्त समितिमा उपस्थित भएर आसन्न अमेरिका भ्रमणबारे जवाफ दिने कार्यक्रम रहेको छ ।
बिहान १० बजे संसदीय सचिवालय, सिंहदरबारमा बस्ने बैठकमा विवास्पद ‘एसपीपी’ सम्झौताबारे सरकारको निर्णय र प्रधानमन्त्री देउवाको अमेरिका भ्रमणबारे उठेका प्रश्नहरुको जवाफ माग गरिने जनाइको छ । देउवाले सरकार प्रमुखका तर्फबाट समितिलाई जवाफ दिनेछन् ।
यसअघि शुक्रबार बसेको समितिको बैठकले एसपीपीबारे सरकारको भनाइ मौखिकरूपमा नभई लिखित रुपमा सरकारको निर्णयकै रूपमा आउनुपर्ने निष्कर्ष निकालेको थियो । र, सोही बैठकले परराष्ट्रमन्त्री नारायण खड्का र प्रधान सेनापति प्रभुराम शर्मालगायतसँग एसपीपीका सवालमा छलफल गरेको थियो ।
प्रधानमन्त्रीको आसन्न अमेरिका भ्रमणको औचित्यमाथि प्रश्न उठिरहेका बेला समितिले सो भ्रमणका सिलसिलामा कुनै पनि विवादास्पद एवं स्वतन्त्र र असंलग्न परराष्ट्र नीतिसँग मेल नखाने सहमति नगर्न, नगराउन सरकारलाई निर्देशन समेत दिइसकेको छ ।