जसपा फुटाउने भट्टराईको षड्यन्त्र परास्त भयो : अध्यक्ष यादव
सहयात्रा टिभी
काठमाडौँ । ३१ असार, जनता समाजवादी पार्टी (जसपा) का अध्यक्ष उपेन्द्र यादवले जसपा फुटाउने डाक्टर बाबुराम भट्टराईको षड्यन्त्र असफल भएको बताएका छन् ।
वीरगञ्जमा सम्पन्न पार्टीको केन्द्रीय समिति बैठकको निर्णय सार्वजनिक गर्न शुक्रबार बिहान आयोजित पत्रकार सम्मेलनमा अध्यक्ष यादवले भट्टराईको पार्टी फुटाउने सपना चकनाचुर भएको बताएका हुन् ।
भट्टराईले पार्टी फुटाउने षड्यन्त्र गरेको तर संख्या नभएर आफैँ परास्त हुन पुगेको यादवको भनाइ छ । ‘आफ्नो गुटको बैठक बोलाउनुभयो, यो गलत थियो ।’ उनले भने, ‘पार्टी विधानविपरीत कार्य गरेर अर्को जसपा दर्ता गराउने सपना चकनाचुर भएको छ ।’
भट्ट पक्षको काठमाडौँमा भएको बेठकले जसपाबाट छुट्टिएर अर्को पार्टी बनाउने निर्णय गरेकाले उनीहरुलाई पार्टीको जिम्मेवारीबाट मुक्त गरिएको अध्यक्ष यादवले बताए ।
अध्यक्ष यादव नेतृत्वको जसपाको बिहीबार बसेको बैठकले संघीय परिषद अध्यक्ष भट्टराईसहित नौ जनालाई पार्टीबाट निष्कासन गर्ने निणर्य गर्दै जिम्मेवारीबाट मुक्त गरेको थियो ।
भट्टराईसहित गंगानारायण श्रेष्ठ, प्रशान्त सिंह, महेन्द्र राय यादव, हिसिला यमी, भक्तबहादुर शाह, दानबहादुर चौधरी, रमेश यादव, दुर्गा सोबलाई पदमुक्त गरिएको थियो ।