Category: मुख्य समाचार

बैशाख १३, २०७४ । आज मातातीर्थ औंशी  अर्थात आमाको मुख हेर्ने दिन ।
ममताकी प्रतीक आमाको आशीर्वाद लिने र सम्मान गर्ने दिनका रुपमा वैशाख कृष्ण औंशीलाई मातातीर्थ औंशीका रुपमा मनाउने गरिन्छ । बिहानै उठेर नुहाएर आफनी आमालाई तीर्थ बराबर मानेर उपहार, मीठो खानेकुरा, नया“ कपडा आदि दिने र आशिर्वाद लिने गरिन्छ । आमाप्रति सम्मान प्रकट गर्ने मानिसहरु आमा भएको ठाउँमा पुग्ने गर्छन । आमाले पनि छोराछोरीलाई दीर्घायु, सुस्वास्थ्यको आशिर्वाद दिने चलन छ । आमा नभएकाहरुले काठमाडौंको थानकोटस्थित मातातीर्थ कुण्डमा स्नान गरि फलफूल, खाद्यन्न चढाउने गर्दछन् । दिवंगत आमाको सम्झनामा श्राद्ध तथा दान गर्न वैशाख कृष्ण औंसीमा मातातीर्थमा ठूलो मेला लाग्ने गर्दछ । मेलामा सहभागी भई त्यहा“स्थित कुण्डमा स्नान गरि दान गरेमा आमा दिवंगत हुने छोराछोरीले आमालाई तिर्नुपर्ने ऋणबाट मुक्त हुने धार्मिक विश्वास छ । आजकै दिन भक्तपुरका नेवार समुदायले भक्तपुरको हनुमानघाटमा गई आमाको सम्झनामा श्राद्ध गरी तर्पण दिने प्रचलन छ

१२ बैशाख, काठमाडौं । सर्वोच्च अदालतले नेपाल प्रहरीका डीआईजी नवराज सिलवालमाथि कुनै पनि कारवाही अघि नबढाउन सरकारका नाममा अन्तरिम आदेश दिएको छ । सर्वोच्चका बिभिन्न तीन न्यायाधीशको संयुक्त इजलासले अदालतमा बिचाराधीन मुद्दाको किनारा नलागेसम्म सिलवालमाथि कुनै कारवाही अघि नबढाउन आदेश दिएको हो । आदेशमा आईजीपी नियुक्ति सम्बन्धी कुनै पनि प्रसंगलाई लिएर सिलवाल उपर कुनै प्रकारबाट छानविन, निलम्बन वा कुनै प्रकारको अभियोगमा मुद्दा लगाउने कार्य नगर्न नगराउन उल्लेख छ ।
सरकारी कागज किर्ते गरेको अभियोगमा सरकारले डीआईजी सिलवालमाथि छानविन थालेको थियो । सरकारी छानविन समितिले सोमबार सिलवाललाई पक्राउ गरेर बयान लिन खोजेपनि बन्दी प्रत्यक्षीकरणको मुद्दा हालेपछि उनी छुटेका थिए । आईजीपी नियुक्तिमा सिलवालले आफूमाथि अन्याय भएको भन्दै दायर गरेको मुद्दाको बैशाख १९ गतेबाट पूर्ण इजलासले सुुनुवाई हुँदैछ ।

बैशाख १२, २०७४ । सरकारले गर्न लागेको संविधान संशोधन प्रक्रियामा नकारात्मक रहेको प्रमुख प्रतिपक्षी नेकपा एमाले सरकारसंग झन रुष्ठ भएको छ । सरकारले पहिलेको भन्दा झन खतरनाक संविधान संशोधन प्रस्ताव ल्याएको र संवैधानिक व्यवस्था विपरित तराईमा स्थानीय तहको संख्या बढाउन खोजेको एमाले व्यवस्थापिका संसद्को बैठक पनि अवरूद्ध गरेको छ । स्थानीय तह पुर्नसंरचना आयोगको प्रतिवेदन खण्डित हुने गरी विभिन्न जिल्लामा कोटा बाँडेर परिपत्र गरेको एमालेको आरोप छ । बैठकको प्रारम्भमै समय लिएर बोल्दै सांसद गंगालाल तुलाधरले सो विषयमा सम्बन्धित मन्त्रीले जवाफ नदिएसम्म संसद चल्न नदिने बताएपछि एमाले सासंसदहरुले आ–आफ्नो स्थानमा उभिएर विरोध जनाएका थिए । उहाँले संघीय मामिला तथा स्थानीय विकास मन्त्रालयले केही जिल्लामा स्थानीय तहको संख्या बढाउन परिपत्र गरेको विषय सदनलाई जानकारी गराउन माग गर्नुभयो ।
निर्वाचन आयोगसंग असन्तुष्टि, संशोधन बिधेयक असफल पार्ने
नेकपा एमाले स्थायी कमिटी बैठकले बजेट ल्याएर निर्वाचन गर्न मिल्ने भनी निर्वाचन आयोगले दिएको अभिव्यक्तिप्रति आपत्ति जनाएको छ । अध्यक्ष केपी ओली निवास बालकोटमा बसेको स्थायी कमिटी बैठकले एक महिनाको अन्तर पारेर दुई चरणमा चुनाव गराउन खोज्नु र बजेट भाषणपछि बहुसंख्यक प्रदेशमा निर्वाचन गराउने योजना षडयन्त्रमूलक रहेको ठहर गरेको छ । बैठकले सरकारको षडयन्त्रको शिकार नबन्न आयोगलाइ आग्रह समेत गर्ने निर्णय गरेको छ । आयोगमा संसदीय दलका उपनेता सुवास नेम्वाङ सहितको टोलीले गम्भीर आपत्ति सहितको लिखित असहमति दर्ज गर्ने छन । बैठकका अध्यक्ष केपी ओलीले जेठ १५ गते चुनावी बजेट पेश गरेर त्यहि बजेटको भाषण गर्दै भोट माग्न जाने सत्तापक्षको षडयन्त्रलाई कुनै हालतमा सफल हुन नदिने बताउनु भएको थियो । बैठकले सरकारले संसदमा पेश गरेको संविधान संशोधन बिधेयक पारित हुन नदिने समेत निर्णय गरेको छ ।

बैशाख १२, २०७४ । व्यवस्थापिका संसदको बैठका आज सरकारले हिजो पेश गरेको संविधानको दोस्रो संशोधन विधेयकबारे सैद्धान्तिक छलफल हुँदैछ । राष्ट्रिय जनता पार्टी र संघीय समाजवादी फोरम सहितका तराई केन्द्रीत दलको माग सम्बोधन गर्न सरकारले पेश गरेको विधेयकमाथि आजदेखि सैद्धान्तिक छलफल हुन लागेको हो । सदनले सो संशोधन विधेयकमाथि विचार गरियोस् भन्ने प्रस्ताव पारित गरेपछि सांसदले संशोधनका लागि ७२ घण्टाको समय पाउनेछन् । सरकारले तराई केन्द्रीत दलसंग गरेको सहमति अनुसार संशोधन प्रस्तावमा परिमार्जन राख्ने तयारी गरेको छ । दोस्रो संविधान संशोधन विधेयक खतरनाक भएको भन्दै बिपक्षी एमालेले भने बैठक अवरुद्ध गर्ने तयारी गरेको छ ।

बैशाख १२, २०७४ । भारतमा जारी इण्डियन प्रिमियर लिग आइपिएलमा राइजिङ पुने सुपरजायन्ट विजयी भएको छ । आइपिएल अन्तर्गत गएराति पुनेले मुम्बई इण्डियन्स माथि तीन रनको रोमांचक जित निकालेको हो । १ सय ६१ रनको लक्ष्य पछ्याएको मुम्बईले निर्धारित बीस ओभरमा आठ विकेटको नोक्सानीमा १ सय ५७ रनमात्र जोड्न सक्यो । उसका लागि कप्तान रोहित शर्माले ५८ रन बनाए । बलिङमा पुनेका जयदेव उनधकट र बेन स्टोक्सले समान दुई–दुई विकेट लिए । यसअघि टस हारेर पहिले ब्याटिङ गरेको पुनेले निर्धारित बीस ओभरमा ६ विकेटको नोक्सानीमा १ सय ६० रन बनाएको थियो । उसका लागि राहुल त्रिपाठीले ४५ तथा अजिंक्या राहानेले ३८ रन बनाए । बलिङमा मुम्बईका कर्ण शर्मा र जसप्रित बुम्राहले समान दुई–दुई विकेट हात पारे । प्रतियोगिता अन्तर्गत आज रोयल च्यालेञ्जर्स बेङ्लोर र सनराइजर्स हैदराबादबीच प्रतिस्पर्धा हुनेछ ।।।