Category: मुख्य समाचार

बैशाख ११, २०७४ । स्पेनिस ला लिगामा बार्सिलोना शीर्ष स्थानमा उक्लिएको छ ।
रियल म्याड्रिडमाथि तीन–दुईको रोमांचक जित निकाल्दै बार्सिलोना शीर्ष स्थानमा उक्लिएको हो । आफ्नो घरेलु मैदानमा २८औं मिनेटमा केसिमोरोको गोलसंगै रियलले अग्रता लियो । त्यसको पांच मिनेटमै लियोनल मेस्सीले गोल गर्दै खेल बराबरी गरे । ७३ औं मिनेटमा इभान रेकिटिकले बार्सिलोनाका लागि गोल थपे । ७७ औं मिनेटमा सर्जियो रामोश रेडकार्ड पाउंदै बाहिरिएपछि रियल दस खेलाडीमा सिमित भयो । ८५औं मिनेटमा जेम्स रोड्रिगुएजले गोल गरेपछि खेल २–२ को बराबरीमा पुग्यो । त्यसपछि मेस्सीले अतिरिक्त समयमा बार्सिलोनाका तर्फबाट आफ्नो व्यक्तिगत ५सयौं गोल गर्दै बार्सिलोनाको जित सुनिश्चित पारे । रियलका क्रिष्टियानो रोनाल्डोले गोल गर्ने दुई अवसर खेर फालेका थिए । ३३ खेलमा ७५ अंकका साथ बार्सिलोना शीर्ष स्थानमा रहंदा एक खेल कम खेल्दै ७५ अंक रहेको रियल दोस्रो स्थानमा छ ।।।

बैशाख ११, २०७४ । सरकारले दुई चरणमा स्थानीय तहको चुनाव गर्ने निर्णय गरेको छ । सिंहदरबारमा बसेको मन्त्रिपरिषद् बैठकले पहिलो चरणमा बैशाख ३१ गते प्रदेश नम्बर ३, ४ र ६ को र दोश्रो चरणमा जेठ ३१ गते १, २, ५ र ७ नम्बर प्रदेशमा निर्वाचन हुने निर्णय गरेको हो । बैठकले पहिलो चरणको चुनावको उम्मेदवारी दर्ताको मिति केही दिन पर सार्न निर्वाचन आयोगलाइ आग्रह पनि गर्ने भएको छ । बैशाख ३१ को चुनावका लागि निर्वाचन आयोगले १६ गते उम्मेदारी दर्ताको समय तोकेको छ । त्यस्तै, बैठकले प्रदेश नम्बर २ र ५ मा स्थानीय तहको संख्या बढाउने निर्णय पनि गरेको छ । त्यसका लागि उपप्रधान एवं स्थानीय विकासमन्त्री कमल थापाको नेतृत्वमा कार्यदल गठन गरेको छ ।
एमाले असन्तुष्ट
नेकपा एमालेले वैशाख ३१ र जेठ ३१ गते गरी दुई चरणमा चुनाव गर्ने सरकारको निर्णयप्रति आपत्ति जनाएको छ । संसद भबन नया“ बानेश्वरमा बसेको एमाले संसदीय दलको बैठकले दुई चरणमा चुनाव गर्ने भए दोश्रो चरणको चुनाव जेठ १५ अघि नै गर्नु पर्ने निष्कर्ष निकालेको हो । संविधान अनुसार जेठ १५ गते बजेट सार्वजनिक गर्नुपर्ने भएकाले बजेट अघि र बजेट पछि दुई चुनाव हुन निर्वाचन आचारसंहिताले नदिने एमालेको ठहर छ । बैठकमा ओलीले एमालेलाई बाहिर राखेर दलहरुबीच भएको सहमति मान्य नहुने धारणा राख्नुभएको थियो । एमालेलाई लत्याएर संसोधन प्रस्ताव तयार गरिएको भन्दै अध्यक्ष ओलीले स्वीकार्य नहुने बताउनुभयो ।
दाहाल–ओली भेट
प्रमुख प्रतिपक्षी दल नेकपा एमालेले सरकार र मधेस केन्द्रीत दलबीच भएको सहमतिको लिखित दस्तावेज अध्ययनपछि मात्रै धारणा बनाउने जनाएको छ ।
प्रधानमन्त्री पुष्पकमल दाहाल र एमाले अध्यक्ष केपी ओलीबीचको भेटमा अध्यक्ष ओलीले सहमतिको लिखित दस्तावेज अध्ययनपछि मात्रै एमालेले धारणा आउने जवाफ दिनुभयो । प्रधानमन्त्री दाहालले मोर्चा र संघीय गठबन्धनस“ग दुई चरणमा निर्वाचन गर्ने र परिमार्जनसहित संविधान संशोधन गर्ने विषयमा भएको सहमतिबारे अध्यक्ष ओलीलाई जानकारी गराउनुभएको थियो । ओलीले परिमार्जनसहितको संविधान संशोधनको लिखित दस्तावेज माग्नु भएको थियो ।

बैशाख १०, २०७४ । अस्वस्थ भइ गत चैत २७ गते नर्भिक अस्पताल भर्ना हुनु भएकी पूर्व अधिराजकूमारी प्रेरणा राज्यलक्ष्मी देवी सिंह आज डिस्चार्ज हुनु भएको छ । सिंहको स्वास्थ्य अवस्था राम्रो भएपछि डिस्चार्ज गरिएको अस्पतालले जनाएको छ । सिंहलाई सेरिब्रल भेनस साइनस् थ्रम्बोसिस भएपछि अस्पताल भर्ना गरिएको थियो । सिंह हाल बिना सहायता हिंडडुल गर्न सक्ने भएको अस्पतालले जनाएको छ । सिंहको उपचारमा स्नायू रोग विशेषज्ञ पंकज जलान तथा सिंहका पारिवारिक चिकित्सक किशोरजंग राणा संलग्न हुनुहुन्थ्यो ।

बैशाख १०, २०७४ । प्रधानमन्त्री पुष्पकमल दाहालले पहिलो र दोस्रो चरणको निर्वाचन र त्यसको तयारीबारे निर्वाचन आयोगका आयुक्तहरुसंग परामर्श गर्नुभएको छ । प्रधानमन्त्री दाहालले प्रधानमन्त्री निवास बालुवाटारमा आयोगका आयुक्तहरुसंग परामर्श गर्नुभएको हो । सरकार र संघीय गठबन्धनबीच भएको सहमति कार्यान्वयन गर्ने विषयमा उहाँले आयुक्तहरुको राय बुझनु भएको प्रधानमन्त्रीको सचिवालयले जनाएको छ । प्रधानमन्त्री दाहालले दुइ चरणमा निर्वाचन गर्न सकिने स्थिति, आयोगको अफ्ठ्यारो र प्राविधिक तयारी लगायतका विषयमा चासो राख्नु भएको थियो ।

बैशाख १०, २०७४ । भारतमा जारी इण्डियन प्रिमियर लिग आइपिएलमा मुम्बई इण्डियन्स शीर्ष स्थानमा कायमै छ । आइपिएल अन्तर्गत दिल्ली डेयर डेभिल्समाथि १४ रनको सनसनिपूर्ण जित निकाल्दै लगातार ६ खेलमा जितका साथ मुम्बईले आफ्नो शीर्ष स्थान कायमै राखेको हो । १ सय ४३ रनको लक्ष्य पछ्याएको दिल्लीले निर्धारित २० ओभरमा ७ विकेटको नोक्सानीमा १ सय २८ रनमात्र जोड्न सक्यो । दिल्लीकातर्फबाट क्रिस मोरिसले ५२ र कासिगो रबाडाले ४४ रन जोड्नु बाहेक अन्यले दोहोरो रन बनाउन सकेनन् । दिल्लीका ३ ब्याट्म्यान शुन्य रनमा पेभेलियन फर्केका थिए । बलिङतर्फ मुम्बईका मिचेल म्याक्लेनगनले ३ र जसप्रित बुम्राहले २ विकेट लिए । यसअघि टस हारेर पहिले ब्याटिङ गरेको मुम्बइले निर्धारित बीस ओभरमा आठ विकेट गुमँएर १ सय ४२ रन बनाएको थियो । उसका लागि जोश बट्लरले २८, केरोन पोलार्डले २६ तथा हार्दिक पाण्ड्याले २४ रन बनाए । बलिङतर्फ दिल्लीका अमित मिश्रा र पाट कुमिन्सले समान दुई–दुई विकेट लिए । मुम्बईको यो छैठौं लगातार जित र दिल्लीको लगातार चौथो हार हो । प्रतियोगिता अन्तर्गत आज गुजरात लायन्स र किंग्स एलाभेन पञ्जाब र कोलकाता नाइट राइडर्स र रोयल च्यालेञ्जर्स बेङ्लोरबीच प्रतिस्पर्धा हुनेछ ।।।